Stavros Floros, sem tók þátt í grísku útgáfu raunveruleikaþáttanna Survivor, hefur höfðað mál gegn framleiðendum þáttanna vegna alvarlegs slyss sem varð við tökur í maí síðastliðnum. Floros missti vinstri fótinn fyrir ofan hné í slysinu og krefst nú meira en 100 milljóna Bandaríkjadala í skaðabætur.

TMZ greinir frá þessu og vísar til dómsgagna.

Samkvæmt málshöfðuninni varð slysið 11. maí þegar Floros var við spjótveiðar í sjó til að afla matar fyrir þáttinn. Skrúfa ferðamannabáts skall þá á honum með þeim afleiðingum að fóturinn fór af fyrir ofan hné.

Floros heldur því fram að framleiðendur Survivor hafi byggt verkefni keppenda að verulegu leyti á spjótveiðum á opnu hafi þrátt fyrir að mikil umferð ferðamannabáta væri á svæðinu. Hann segir hvorki hafa verið komið upp sérstökum öryggissvæðum né öryggisbátum og að viðvörunarmerkingum hafi verið ábótavant.

Í málsgögnum kemur jafnframt fram að áður hafi orðið hættuleg atvik á sömu slóðum og jafnvel banaslys.

Floros segir fót sinn hafa horfið í hafið eftir slysið. Hann var í kjölfarið fluttur á sjúkrahús í Miami þar sem hann gekkst undir nokkrar skurðaðgerðir. Sjúkrahúsdvölin stóð yfir í 61 dag.

Floros krefst nú meira en 100 milljóna dala í skaðabætur vegna slyssins.