Reykjavíkurborg hefur ekki svarað spurningum Mannlífs um áfengiskaup borgarinnar í fyrra.

Mannlíf sendi upphaflega fyrirspurn þann 2. febrúar þar sem spurt var eftirfarandi spurninga:

1. Hversu miklu eyddi borgin í áfengiskaup í fyrra?
2. Af hverjum keypti borgin áfengið og fyrir hversu háa upphæð?
3. Hvaða deildir innan borgarinnar keyptu áfengið?
4. Er Reykjavíkurborg með stefnu þegar kemur að áfengiskaupum eða áfengisdrykkju á vegum/viðburðum borgarinnar? Ef svo er, hver er hún?

Þrátt fyrir ítrekanir Mannlífs við þessum spurningum hefur ekki borist svar frá borginni.

Útgjöld borgarinnar hafa verið í umræðunni síðan RÚV fjallaði um notkun Heiðu Bjargar Hilmisdóttur borgarstjóra á kreditkorti borgarinnar en Heiða hefur síðan svarað þeim fréttum ítarlega.

Í frétt DV frá árinu 2018 kemur fram að borgin hafi eytt 2.484.462 krónum í áfengiskaup árið 2017.