Héraðsdómur Reykjaness hefur sýknað mann sem ákærður var fyrir stórfelld eignaspjöll vegna eldsvoða í nýbyggingu í október 2023. Ákæruvaldið taldi manninn hafa kveikt í hrúgu af timbri, plasti og öðrum byggingarefnum með eldvörpu, með þeim afleiðingum að mikill eldur kviknaði og tjón nam rúmlega 45 milljónum króna.
Samkvæmt dóminum kviknaði eldurinn í kjallara nýbyggingar þar sem geymd voru byggingarefni. Brunarannsókn leiddi í ljós að eldurinn hefði verið af mannavöldum og ekki komið upp af sjálfu sér. Rannsókn sýndi jafnframt að ekki voru rafmagnstæki eða aðrir mögulegir sjálfkveikjuvaldar á vettvangi.
Óumdeilt var að ákærði og nokkur önnur ungmenni höfðu farið inn í bygginguna umrædda nótt. Fyrir dómi kom fram að ákærði hefði fundið eldvörpu á staðnum og prófað hana. Nokkur vitni báru að hann hefði verið sá eini sem notaði tækið. Hins vegar sá enginn vitnanna sjálf upptök eldsins.
Við meðferð málsins kom einnig fram að hluti hópsins hafði reykt inni í byggingunni og að logandi sígarettum eða kannabisvindlingum hefði verið kastað frá sér. Sérfræðingur í brunarannsóknum útilokaði ekki að slíkt hefði getað valdið eldsupptökum við ákveðnar aðstæður.
Dómurinn taldi að þótt sterkar líkur bentu til þess að eldurinn hefði kviknað vegna notkunar eldvörpunnar hefði ákæruvaldinu ekki tekist að sanna sök ákærða svo hafið væri yfir skynsamlegan vafa. Ekki væri hægt að útiloka að eldurinn hefði kviknað af logandi sígarettu eða öðrum hætti.
Maðurinn var því sýknaður af ákærunni.
