Íslenskur maður á fertugsaldri hefur verið handtekinn í Phuket í Taílandi, grunaður um að hafa stolið síma og handtösku af leigubílstjóra. Taílenski fjölmiðillinn Khaosod greinir frá málinu og hefur lögregla birt myndskeið úr öryggismyndavél sem sýnir hluta atburðarásarinnar.
Samkvæmt frásögn leigubílstjórans tók hún manninn upp fyrir utan sjúkrahús í Patong og ók með hann að hóteli í Wichit í Mueang-hverfinu. Á leiðinni er hann sagður hafa tekið síma hennar og handtösku sem innihélt meðal annars persónuskilríki.
Konan segist hafa orðið vör við athæfið og reynt að ná eigum sínum til baka. Farþeginn hafi hins vegar neitað að afhenda þær og veitt henni mótspyrnu. Hún stöðvaði því bílinn og þeytti bílflautuna til að vekja athygli vegfarenda. Við það komu nærstaddir til aðstoðar og skilaði maðurinn þá eigunum.
Lögregla birti síðar upptökur úr eftirlitsmyndavél bílsins og lýsti eftir manninum. Hann var handtekinn síðar sama dag og hefur verið kærður fyrir þjófnað.
Maðurinn er Jóhann Freyr Hallgrímsson. Hann segir að um misskilning hafi verið að ræða en ekki ásetningsbrot. Í samtali við DV kveðst hann hafa verið mjög flugþreyttur og sofnað í leigubílnum eftir að hafa greitt fargjaldið fyrir fram.
Þegar hann vaknaði hafi hann verið illa áttaður og talið að handtaska sem hann sá í bílnum tilheyrði eiginkonu sinni. Hann segist hafa tekið töskuna í þeirri trú. Þegar honum hafi verið sýnt innihald hennar hafi hann áttað sig á mistökunum, beðist afsökunar og yfirgefið bílinn.
Jóhann segir að honum hafi verið ráðlagt að semja við konuna um miskabætur og hafi hann boðið henni 35 þúsund taílensk baht, jafnvirði um 140 þúsund íslenskra króna. Hann leitar nú aðstoðar lögmanns og hefur einnig haft samband við borgaraþjónustu utanríkisráðuneytisins.
