Andy Williams, fyrrverandi glímukappi hjá All Elite Wrestling, lést á laugardag í miðjum glímubardaga í Pennsylvaníu. Williams, sem var 48 ára, var þekktur í glímuheiminum undir nafninu The Butcher.

Samkvæmt upplýsingum frá réttarlækni í Allegheny-sýslu lést Williams á laugardagskvöld. Hann hafði fyrr um kvöldið tekið þátt í glímunni á viðburði Enjoy Wrestling í Mr. Small's Theater í Millvale.

Williams og félagi hans, The Blade, kepptu þar gegn TME. Aðstandendur Enjoy Wrestling greindu frá því að Williams hefði hnigið niður í lok bardagans. Læknar komu honum þegar til aðstoðar og hófu endurlífgun áður en sjúkrabíll flutti hann á sjúkrahús. Viðburðinum var í kjölfarið aflýst og áhorfendur sendir heim.

AEW staðfesti andlát Williams og sendi fjölskyldu hans, vinum og aðdáendum samúðarkveðjur. Í yfirlýsingu sambandsins var Williams minnst bæði fyrir feril hans í tónlist og atvinnuglímu og sagt að hann hefði notið mikillar virðingar meðal starfsfélaga.

Williams var einnig þekktur tónlistarmaður og lék á gítar með þungarokkshljómsveitinni Every Time I Die. Hann hafði um árabil keppt í AEW ásamt The Blade undir merkjum The Butcher and The Blade.