Þorgerður Katrín Gunnarsdóttir utanríkisráðherra og Kristrún Frostadóttir forsætisráðherra gagnrýndu harðlega færslu Donalds Trumps Bandaríkjaforseta á samfélagsmiðlum í gær, þar sem Ísland, Grænland, Kanada, Mexíkó og fleiri ríki voru sýnd í fánalitum Bandaríkjanna.
Ráðherrarnir ræddu málið við blaðamenn í morgun á kynningarfundi ríkisstjórnarinnar um áherslumál komandi vetrar. Þorgerður kallaði Billy Long, sendiherra Bandaríkjanna á Íslandi, á sinn fund í gær vegna málsins.
„Það var algjörlega óviðeigandi,“ sagði Þorgerður og bætti við að henni hefði ítrekað verið bent á, meðal annars innan bandarísku stjórnsýslunnar, að ekki ætti að taka Trump bókstaflega en nauðsynlegt væri að taka honum alvarlega.
Þorgerður lagði áherslu á að Ísland væri fullvalda og sjálfstætt ríki sem réði eigin örlögum. Engir aðrir gætu höndlað með sjálfstæði eða fullveldi landsins. Þá ítrekaði hún stuðning Íslands við rétt Grænlendinga til að ákveða eigin framtíð.
Hún sagðist áfram hlakka til samstarfs við Bandaríkin en sagði færslu forsetans ekki geta talist eðlilega.
„Þetta er ekki grín að mínu mati og ef þetta á að vera grín er þetta lélegt grín,“ sagði Þorgerður.
Kristrún tók undir gagnrýnina og sagði undirtón færslunnar „fáránlegan“.
„Þetta er móðgun við Íslendinga, Kanadamenn og Grænlendinga að tjá sig með þessum hætti,“ sagði Kristrún. Hún sagði ekkert fyndið eða eðlilegt við að gera grín að fullveldi ríkja, sérstaklega á tímum þegar fullveldi væri ekki sjálfgefið.
Kristrún sagði samskipti við Bandaríkjamenn almennt góð en að aðstæður í þessum heimshluta væru nú óvenjulegar. Íslendingar þyrftu því að standa fast á sínu.
