Hæstiréttur hefur dæmt Þorstein Hermann Þorbjörnsson í 14 ára fangelsi fyrir að hafa orðið sambýliskonu sinni að bana á heimili þeirra í Naustahverfi á Akureyri í apríl árið 2024. Með dóminum var refsing hans lækkuð um tvö ár frá niðurstöðu Landsréttar.

Málið vakti mikla athygli en konan hlaut alvarlega og umfangsmikla áverka eftir langvarandi ofbeldi af hálfu Þorsteins. Í Héraðsdómi Norðurlands eystra var hann sakfelldur fyrir ofbeldi í nánu sambandi sem leiddi til dauða og dæmdur í 12 ára fangelsi. Landsréttur taldi hins vegar sannað að hann hefði banað konunni af ásetningi og þyngdi dóminn í 16 ára fangelsi.

Hæstiréttur komst að þeirri niðurstöðu að ekki lægju fyrir nægilega haldbærar sannanir um ásetning á verknaðarstundu. Taldi rétturinn fremur að um stórfellt gáleysi hefði verið að ræða sem leiddi til dauða konunnar.

Þorsteinn var því sakfelldur fyrir stórfellda líkamsárás sem leiddi til bana auk stórfellds ofbeldisbrots í nánu sambandi og dæmdur í 14 ára fangelsi.