Héraðssaksóknari hefur gefið út ákæru á hendur þremur karlmönnum á þrítugsaldri vegna meintrar tilraunar til manndráps sem átti sér stað í bílakjallara undir Höfðatorgi í mars síðastliðnum. Brotaþoli í málinu, íslenskur karlmaður á þrítugsaldri, fer fram á tíu milljónir króna í miskabætur.

Samkvæmt ákærunni er einum mannanna gefið að sök að hafa ekið Land Rover-bifreið á brotaþola á miklum hraða. Annar er sakaður um að hafa veist að honum með ítrekuðum höggum með óþekktu áhaldi, en sá þriðji um að hafa stungið hann í vinstri rasskinn með óþekktu stunguvopni.

Afleiðingar árásarinnar eru sagðar hafa verið mjög alvarlegar. Í ákærunni kemur fram að brotaþoli hafi verið í lífshættulegu ástandi og hlotið fjölmarga áverka. Þar á meðal voru sár á vinstri rasskinn, lungnamar á báðum lungum, blóðþurrðarlost, brot á upphandleggsbeini auk marra, bólgna, fleiðusára og eymsla víða um líkamann.

Mennirnir þrír sem sæta ákæru eru allir erlendir ríkisborgarar.