Donald Trump Bandaríkjaforseti kom Mariu Bartiromo, þekktum sjónvarpsmanni og dyggum stuðningsmanni hans, til varnar á föstudag eftir að henni var sagt upp störfum hjá Fox News.
Samkvæmt bandarískum fjölmiðlum var Bartiromo rekin fyrir að hafa komið innri samskiptum Fox News til Hvíta hússins. Samskiptin tengdust röngum fullyrðingum Trumps um forsetakosningarnar árið 2020.
„Maria er algjör fagmaður og sannur baráttujaxl. Aðdáendur hennar, sem eru margir, verða ekki ánægðir,“ skrifaði Trump.
Trump hefur ítrekað haldið því ranglega fram að hann hafi unnið forsetakosningarnar 2020, en Joe Biden bar sigur úr býtum.
Málið er sérstaklega viðkvæmt fyrir Fox News, sem hefur gert kostnaðarsamar sáttir í tveimur meiðyrðamálum vegna rangra ásakana um að fyrirtæki sem framleiða kosningabúnað hefðu átt þátt í að hagræða niðurstöðum kosninganna.
Bartiromo hefur sjálf fjallað um og ýtt undir fullyrðingar Trumps um kosningasvik og óreglu.
New York Times greindi frá því að Bartiromo hefði meðal annars komið skilaboðum innan Fox til Hvíta hússins þar sem blaðamenn voru varaðir við að fjalla um órökstuddar fullyrðingar forsetans.
