Lögreglan á höfuðborgarsvæðinu hafði í nógu að snúast í dag og sinnti meðal annars útköllum vegna líkamsárása, innbrots, umferðarlagabrota, aksturs undir áhrifum fíkniefna og slyss á hjólreiðamanni.

Tilkynnt var um slagsmál í miðbæ Reykjavíkur þar sem gerandi var farinn af vettvangi þegar lögreglu bar að. Árásarþoli var fluttur með sjúkrabifreið á sjúkrahús til aðhlynningar.

Síðar barst tilkynning um líkamsárás í miðbænum þar sem árásarþoli hlaut nokkra áverka og var fluttur á sjúkrahús. Lögregla hefur borið kennsl á meintan geranda og stendur leit yfir að honum.

Þá var brotist inn á veitingastað í miðborginni. Lögreglumenn skoðuðu upptökur úr öryggismyndavélum á vettvangi og tókst skömmu síðar að hafa uppi á meintum geranda.

Lögregla var einnig kölluð að mathöll í miðbænum vegna ölvaðra manna sem voru til vandræða.

Í umferðareftirliti voru nokkrir ökumenn stöðvaðir vegna brota. Einn ökumaður var stöðvaður fyrir of hraðan akstur og kom jafnframt í ljós að ljósabúnaður bifreiðarinnar var ekki í notkun. Annar ökumaður var stöðvaður fyrir hraðakstur og reyndist einnig vera undir áhrifum fíkniefna.

Þrír ökumenn til viðbótar voru stöðvaðir grunaðir um akstur undir áhrifum fíkniefna. Einn þeirra reyndist jafnframt sviptur ökuréttindum. Þá var annar ökumaður kærður fyrir akstur sviptur ökuréttindum.

Tveir ökumenn voru einnig kærðir fyrir of hraðan akstur. Annar þeirra var sviptur ökuréttindum á vettvangi eftir að hafa mælst á meira en tvöföldum leyfilegum hámarkshraða.

Að auki barst lögreglu tilkynning um slys á hjólreiðamanni við Úlfarsfell. Ekki lá fyrir hversu alvarleg meiðsl hans voru þegar yfirlitið var tekið saman.

Loks var tilkynnt um þjófnað á skráningarmerkjum af bifreið.