Lögreglan á höfuðborgarsvæðinu sinnti fjölbreyttum verkefnum í gærkvöldi og í nótt, þar á meðal umferðareftirliti, rannsókn líkamsárásar og útköllum vegna ölvunar og þjófnaðar.
Einstaklingi sem var undir áhrifum áfengis, en taldist ekki valda sér eða öðrum hættu, var ekið heim til sín. Þá barst tilkynning um þjófnað í Laugardal og er málið til rannsóknar.
Lögregla hafði einnig afskipti af farþega sem sagður er hafa neitað að greiða fyrir leigubílaferð og ráðist á bílstjórann. Viðkomandi var vistaður í fangageymslu í þágu rannsóknar málsins.
Nokkrir ökumenn voru stöðvaðir vegna aksturs undir áhrifum fíkniefna og voru þeir látnir lausir að lokinni sýnatöku. Einnig voru afskipti höfð af ökumönnum sem óku án gildra ökuréttinda eða sviptir ökurétti.
Umferðareftirlit lögreglu leiddi í ljós fjölda hraðakstursbrota. Einn ökumaður mældist á 115 km hraða þar sem leyfilegur hámarkshraði er 80 km á klukkustund. Tveir aðrir voru stöðvaðir á 148 og 130 km hraða á sama vegarkafla. Þá var einn ökumaður mældur á 112 km hraða þar sem hámarkshraði er 60 km á klukkustund og annar á 116 km hraða á 80 km svæði. Allir eiga þeir yfir höfði sér sektir.
Þá var ökumaður sektaður fyrir akstur á nagladekkjum utan leyfilegs tíma.
Að lokum var tilkynnt um umferðarslys í Grafarvogi þar sem grunur leikur á að ökumaður hafi verið undir áhrifum fíkniefna. Viðkomandi var vistaður í þágu rannsóknar málsins.
