Héraðsdómur Reykjavíkur hefur dæmt mann í 45 daga skilorðsbundið fangelsi fyrir röð brota sem náðu yfir tæplega tveggja ára tímabil, meðal annars líkamsárásir, húsbrot, eignaspjöll, vopnalagabrot, fíkniefnalagabrot, akstur undir áhrifum fíkniefna og brot gegn lögreglulögum. Samverkamaður hans var einnig sakfelldur fyrir líkamsárás, húsbrot, eignaspjöll og vopnalagabrot, en ákvörðun refsingar hans var frestað skilorðsbundið.
Afbrotamennirnir eru ekki nafngreindir í dómnum og er sennilegt að það sé vegna ungs aldurs.
Málið á rætur að rekja til atburða í Kópavogi í apríl 2024. Samkvæmt dóminum réðst aðalmaðurinn á tvo einstaklinga og sló þá ítrekað í andlit með þeim afleiðingum að þeir hlutu áverka. Í framhaldinu réðust báðir mennirnir á þriðja einstaklinginn á heimili hans, neituðu að yfirgefa staðinn þrátt fyrir ítrekaðar beiðnir og ollu skemmdum á húsnæðinu. Við brottför dró annar þeirra upp hníf, lamdi í dyrastaf og útidyrahurð með hnífsskafti og sparkaði í glugga. Við öryggisleit fannst einnig hnífur á hinum ákærða.
Auk þess var aðalmaðurinn sakfelldur fyrir vörslu 2,76 gramma af tóbaksblönduðu kannabisefni, akstur undir áhrifum kannabis þar sem magn virka efnisins mældist 5,6 nanógrömm í millílítra blóðs og fyrir að hafa hunsað fyrirmæli lögreglu fyrir utan skemmtistaðin Útópíu við Austurstræti þar sem hann var með glerflösku og sýndi ógnandi hegðun.
Báðir ákærðu játuðu sök skýlaust fyrir dómi. Við ákvörðun refsingar leit dómurinn meðal annars til ungs aldurs þeirra, hreinnar játningar og tafa sem urðu á rannsókn og útgáfu ákæru.
Aðalmaðurinn var jafnframt dæmdur til að greiða 200 þúsund króna sekt, sæta 18 mánaða sviptingu ökuréttar og upptöku fíkniefna og hnífs. Þá voru mennirnir dæmdir til að greiða einum brotaþola 250 þúsund krónur í miskabætur sameiginlega, en aðalmaðurinn einn greiðir tveimur öðrum brotaþolum samtals 700 þúsund krónur í miskabætur.
