Næstkomandi sunnudag klukkan 20:00 verða haldnir tónleikar í Tjarnarbíói, þar sem Valur og Regnúlpurnar flytja lög kanadíska söngvaskáldsins Leonard Cohen á íslensku. Hljómsveitina skipa Valur Gunnarsson, Egill Viðarsson, Elvar Geir Sævarsson og Loftur Sigurður Loftsson.
Valur Gunnarsson, blaða- og tónlistarmaður, er téður Valur en hann hefur lengi verið aðdáandi Cohens. Mannlíf ræddi við hann um tónleikana.
Segðu mér frá tónleikunum sem þú munt halda á sunnudaginn.
„Farið verður yfir lífshlaup Leonard Cohen í stórum dráttum, allt frá því hann yfirgaf Montreal árið 1966 og þar til hann gekk í klaustur árið 1994. Þegar hann flutti til New York þótti hann hálf skrýtinn, miðaldra kanadískt ljóðskáld sem vildi verða poppstjarna. En Lou Reed hafði lesið bækur hans og tók honum fagnandi og kynnti hann fyrir senunni, Andy Warhol og hinni þýsku Nico, sem hann varð bálskotinn í og samdi mörg lög um en sú var gefinn fyrir yngri menn, meðal annars Dylan. Svo verður haldið með honum út í eyðimörkina og alla leið til Íslands og loks í klaustur. Inn á milli verða flutt lög eftir hann á íslensku, sem hann reyndar sjálfur veitti blessun fyrir meðan hann var enn í klaustrinu.“
Þú sagðir mér að Cohen hefði verið sá eini sem hefði vitað hvað endalok kalda stríðsins þýddi og að hann hafi spáð fyrir um endalok Bandaríkjanna, geturðu útskýrt það betur?
„Skömmu eftir fall múrsins, þegar allir bjuggust við betri tíð og jafnvel endalokum sögunnar, sá Cohen að nú væri allt að gliðna í sundur. Sjálfur hafði hann leitað eftir strúktur í eigin lífi sem hann fann loks í klaustrinu, en þegar tvípólakerfi kalda stríðsins leið undir lok sá hann að fjandinn var laus. Hann sendi frá sér spádómsplötuna The Future, þar sem segir meðal annars: „I have seen the Future brother, it is murder.“ Morðingjar á háum stöðum fara með bænir en særa fram storminn, segir á öðrum stað. Þetta hefði til dæmis vel getað átt við innrásina í Írak, sem ég held að hafi verið nokkurs konar erfðasynd 21. aldar og við erum enn að fást við afleiðingarnar af. Síðar sagði hann í ljóði: „And one more thing, you won‘t like what comes after America.“ Þetta hljómaði hálf-klikkað árið 2012 en virðist nú vera að raungerast. Og afleiðingarnar verða ekki endilega góðar.“
Hvað mega gestir eiga von á á sunnudaginn?
„Nokkrum góðum stundum áður en allt hrynur.“
