Óánægju gætir nú innan bresku konungsfjölskyldunnar eftir að Meghan Markle, hertogaynja af Sussex, birti ljósmyndir á samfélagsmiðlinum Instagram sem sýna Harrý prins og börn þeirra á Althorp-setrinu, æskuheimili og greftrunarstað Díönu prinsessu. Samkvæmt People Magazine bar færslan yfirskriftina „Summer Holiday“ og hefur mætt harðri gagnrýni konunglegra sérfræðinga sem telja myndina skaða enn frekar sambandið á milli hjónanna og hirðarinnar.

Á ljósmyndunum sést Harrý prins ásamt börnum þeirra ganga með blómvendi eftir grasstíg á landareigninni, sem þykir gefa til kynna að fjölskyldan hafi vitjað grafar Díönu á eyjunni innan setursins. Heimildir herma að Vilhjálmur Bretaprins sé verulega ósáttur við ákvörðunina og að birtingin muni herða afstöðu hans gegn því að bróðir hans fái að snúa aftur til opinberra starfa fyrir konungsfjölskylduna.

Breskir fjölmiðlar og konunglegir rýnar hafa lýst færslunni sem „smekklausri“ og dæmi um nýtingu á viðkvæmum fjölskylduhögum í opinberum tilgangi. Þótt bent hafi verið á að Spencer-fjölskyldan, sem fer með forræði Althorp-setursins, hafi væntanlega veitt leyfi fyrir heimsókninni sjálfri, þykir ákvörðunin um að opinbera einkastundina á samfélagsmiðlum hafa farið yfir strik sem höllin mun seint fyrirgefa. Atvikið er sagt staðfesta þann ótta innan hirðarinnar að ekki sé unnt að treysta Sussex-hjónunum fyrir trúnaðarmálum fjölskyldunnar.