Tveir fullorðnir menn með gjallarhorn hlupu á eftir unglingsdrengjum í síðustu viku og hræddu þá er þeir voru á heimleið eftir bekkjarkvöld. Mennirnir tveir áreittu drengina og hrópu á eftir þeim á flóttanum. Móðir í miðborginni segir ekki óhætt að 13 ára unglingar gangi einir heim að kvöldlagi.
„Við ætlum að ná ykkur,“ kölluðu mennirnir í gjallarhornið á meðan þeir hlupu á eftir hræddum unglingunum. Móðir annars drengsins, Hrefna Sif Gunnarsdóttir Lilliendahl, ritar færslu um þetta á Facebook og biður netverja að deila í þeirri von að mennirnir finnist. „Það kraumar í mér reiðin. Ég vildi athuga hvort að einhver hér hefði orðið var við tvo menn síðastliðið miðvikudagskvöld milli 22:00 og 23:00 með gjallarhorn í Þingholtunum,“ segir Hrefna Sig og bætir við:
„13 ára sonur minn og vinur hans voru á leiðinni heim af bekkjarkvöldi rétt eftir kl 22:00. Þegar þeir voru í Þingholtunum rétt hjá Miðstræti voru tveir menn (fullorðnir) sem byrjuðu að áreita þá. Þeir voru með gjallarhorn og kölluðu, „við ætlum að ná ykkur“ og hlupu á eftir þeim. Ef að þið urðuð vör við þessa menn eða vitið hverjir þeir gætu verið, megið þið endilega senda mér pm. Sömuleiðis er hægt að deila þessum pósti.“
Kolbrún Jónsdóttir tjáir sig undir færslunni. „Ekki góð upplifun fyrir strákana. Vonandi finnast þessir gaurar,“ segir Kolbrún.
Eygló Gunnþórsdóttir tekur einnig þátt í umræðunni og segir það ekki óhætt fyrir unglingana að ganga einir heim að kvöldlagi. „Ég er brjáluð. Þessi lýður er út um allt á kvöldin og ekki ráðlegt að unglingarnir 13 ára labbi einir heim. Best að ná í þau,“ segir Eygló.
Athugasemdir