Ístak fagnar 50 ára afmæli með 6 ára kennitölu – „Þetta er ekki kennitöluflakk“

„Þetta er ekki kenni­tölu­flakk þar sem hin kennitalan er ennþá til. Við erum stolt af langri sögu okkar og teljum okkur eiga hana alla,“ segir Karl Andr­e­as­sen, fram­kvæmda­stjóri Ístaks, um þá stað­reynd að fyr­ir­tækið er með sex ára gamla kenni­tölu á sama tíma og það aug­lýsir 50 ára afmæli.

Í dag aug­lýsti Ístak með stolti 50 ára afmæli sitt en það hóf störf árið 1970 og var stærsta verk­efni fyr­ir­tæk­is­ins það árið gerð Búr­fells­virkj­unar. Síðan þá hefur það komið að mörgum stórum og mik­il­vægum verk­efnum hér á landi, meðal ann­ars Flugstöð Leifs Eiríks­sonar, Ráðhúsi Reykja­víkur og Hval­fjarð­ar­göngin.

Ístak fagnar 50 ára afmæli á árinu og birti heil­síðu í Morg­un­blað­inu í dag af því til­efni.

Saga þess er því merk en stað­reyndin er engu að síður sú að kennitala Ístaks er frá árinu 2014. Aðspurður segir Karl of miklar ábyrgðir hvíla á gömlu kenni­töl­unni vegna útrás­ar­verk­efna sem trufli það sem fyr­ir­tækið sinnir hér á landi.

„Sú sem er vikt núna er sex ára en hin kennitalan er enn við lýði. Við bara notum hana ekki því við fórum í mikla vinnu í Noregi eftir hrunið og þar eru miklar ábygðir ennþá á okkur. Við vorum ekki eins snið­ugir og aðrir að búa til nýja kenni­tölu fyrir útrás­ina. Þetta fór ekki á haus­inn og við klárum okkar plikt en hvílum bara kenni­töl­una. Þetta er ekki kenni­tölu­flakk, og sagan er okkar“ segir Karl.