Óhætt er að segja að dómur Mannréttindadómstóls Evrópu sé niðurlæging fyrir Sigríði Andersen, fyrrverandi dómsmálaráðherra, en brot hennar var einróma niðurstaða dómsins. Á samfélagsmiðlum er gert stólpagrín af henni og má segja að stjórnmálaferill hennar sé jarðsunginn. Sumir spyrja jafnvel hver muni taka sæti hennar á Alþingi.
Sigríður sagði af sér í mars í fyrra, augljóslega ekki af fúsum og frjálsum vilja, enda sagðist hún alltaf vera að stíga til hliðar. Þá hafði Mannréttindadómstóll Evrópu dæmt gegn henni varðandi ólögmæta dómaraskipan við réttinn.
Á Twitter hefur fátt annað verið rætt í morgun en dóminn. Bæði stjórnmálamenn og almenningur virðist telja þetta rassskellingu fyrir Sigríði, Sjálfstæðisflokkinn og ríkisstjórnina í heild sinni. Rósa Björk Brynjólfsdóttir , óháður þingmaður, segir segir þetta niðurlægingu: „Þá er það staðfest. Niðurstaðan gæti ekki verið skýrari. #ECHR vill ekki sjá pólitísk inngrip á Íslandi við skipan dómara. Nú er ekki tíminn til að tala niður Mannréttindadómstól Evrópu,heldur spyrja; hvers vegna ákvað ríkisstjórn Íslands að fara í þennan niðurlægjandi leiðangur?“
Einn maður virðist koma Sigríði til varnar en miðað við viðbrögð annarra þá er óljóst hvort hann sé að grínast. Það hlýtur þó að teljast slæmt ef honum er full alvara. „Dómur yfirdeildar MDE liggur fyrir. Málsmeðferðinni er lokið. Með réttu má því segja að persóna Sigríðar Á Andersen trufli málið ekki lengur & hún hlýtur því að taka aftur við embætti ráðherra eftir að hún steig tímabundið til hliðar af þessum sökum,“ skrifar Halldór Gröndal.
Athugasemdir