Barnsfaðir söngkonunnar Þórunnar Antoníu kærði Valgerði Matthíasdóttur, Völu Matt, til siðanefndar blaðamanna vegna viðtals við Þórunni í Ísland í dag. Þórunn ræddi í viðtalinu ástarsorgina sem fylgdi því að barnsfaðir hennar hafði yfirgefið hana þegar hún var komin fjóra mánuði á leið.
Umræddur maður, Kári Viðarsson, taldi að sér vegið með viðtalinu. Hann kærði því Völu Matt og Sunnu Kristínu Hilmarsdóttur, blaðamann Vísis, sem skrifaði frétt upp úr viðtalinu. Kæran hefur verið birt á vef Blaðamannafélagsins en þar kemur fram að Kára hafi sárnað að honum hafi ekki verið gefinn kostur á að tjá sig um sína hlið.
„Frásögn um að barnsfaðirinn hafi „yfirgefið“ viðmælandann á meðgöngutímanum, „að því er virðist að ósekju“, olli kæranda sársauka og vanvirðu,“ segir í kærunni. Kári taldi að þó hann væri ekki nafngreindur þá sé faðerni barnsins vel þekkt enda fjöldi frétta skrifaðar um samband þeirra meðan allt lék í lyndi.
Þær Vala Matt og Sunna Kristín svöruðu á móti að þetta hafi verið viðtal við opinbera persónu sem vildi opna á umræðu um móðurhlutverkið og stöðu kvenna sem verða einhleypar á meðgöngu. Þórunn hafi sérstaklega tekið fram að hún vildi ekki kasta skugga á barnsföður sinn. „Forræðisdeila viðkomandi foreldra hafi ekki verið til umfjöllunar í viðtalinu og í fréttinni á Vísi.is hafi engar ályktanir verið fregnar heldur eingöngu byggt á ummælum viðmælandans í viðtalinu.“
Siðanefnd komast að þeirri niðurstöðu að Vala Matt og Vísir hafi ekki brotið gegn siðareglum. „Forræðisdeila viðkomandi foreldra var ekki til umfjöllunar,“ segir í niðurstöðu siðanefndar.
Athugasemdir