Sonja Sif Þórólfsdóttir, blaðamaður á Morgunblaðinu, viðurkennir þjófnað í pistli í Morgunblaðinu í vikunni. Sonja Sif er aðdáandi þátta sem heita Little Fires Everywhere sem sýndir voru á síðasta ári. Hún sá þættina hins vegar ekki fyrr en á þessu ári.
„Að lokum ákvað ég að taka upp gamlan ósið og ræna þeim af netinu eins og allir gerðu áður en Netflix varð til,“ segir Sonja og bætir við að vegna þeirrar þróunar að streymisveitur framleiða nú oft sitt eigið sjónvarpsefni sé nauðsynlegt að hafa aðgang að sirka 15 streymisveitum til að geta haldið uppi vitrænum samræðum. Sonja Sif endar pistil sinn á yfirlýsingu:
„Ég ætla bara að halda áfram að vera ræningi. Það er svo miklu, miklu einfaldara.“
Yfirlýsing blaðamannsins hleypti illu blóði í réttarhafa myndefnis hér á landi. Guðrún Björk Bjarnadóttir framkvæmdastjóri Stefs, segir það dapurlegt að blaðamaður, sem sjálfur reiði sig á höfundarrétt í starfi og vinni hjá fyrirtæki sem eigi mikið undir í þeim efnum skuli lýsa yfir að ætla sér að stela áfram efni í framtíðinni.
„Í hennar huga er nauðsynlegt að hafa aðgang að öllu efninu en áskrift af öllum veitunum sé of dýr, því sé í góðu lagi að taka efnið ófrjálsri hendi. Hverslags röksemdarfærsla er þetta eiginlega?“ spyr Guðrún og bætir við:
„Með sömu formerkjum mætti telja í lagi að stela úr nammibarnum í Hagkaup – af því að mann langar að smakka svo margt, en það sé of dýrt að kaupa allt saman.“
Bókaútgefandinn Kristján B. Jónasson tjáir sig einnig um framferði Sonju og segir:
“ … en leiðinlegra að verða vitni að því að blaðamaður á helsta dagblaði landsins montar sig af því að stela hugverkum hægri vinstri og hvetur aðra til þess sama. Það er greinilegt að Píratar eru að taka yfir blaðið af Sjöllunum.“
Athugasemdir