Meðal aðgerða stjórnvalda vegna Covid-19 var styrkur sem hægt er að sækja um til sveitarfélaga vegna íþrótta- og tómstundastarfs barna. Styrkurinn var veittur í fyrsta sinn í fyrra. Fólk hefur enn tækifæri til að sækja um. Hægt er að sækja um til og með 15. apríl 2021
Styrkurinn er veittur vegna barna sem eru fædd á árunum 2005–2014 og búa á heimilum þar sem heildartekjur framfærenda, einstaklings, hjóna eða sambúðarfólks, voru að meðaltali lægri en 740.000 kr. á mánuði á tímabilinu mars–júlí 2020.
Sótt um hjá sínu sveitarfélagi
Áður en sótt er um styrkinn hjá sínu sveitarfélagi þarf að kanna hvort heimilið falli undir ofangreint tekjuviðmið. Það gerir fólk með því að skrá sig inn á Ísland.is með rafrænum skilríkjum. Athugið að sé um hjón/sambúðarfólk að ræða þurfa báðir aðilar að samþykkja að upplýsingar um tekjur séu sóttar til skattayfirvalda (RSK) svo hægt sé að staðfesta hvort heimilið falli undir tekjuviðmiðið eða ekki.
Ef svar fæst um rétt á að sækja um styrk færð þú nánari upplýsingar um næstu skref. Ef þú færð svar um að þú eigir ekki rétt á styrk færð þú upplýsingar um hvert þú getur leitað ef þú ert með athugasemdir við niðurstöðuna eða fyrirspurnir.
- Miðað er við að íþrótta- og tómstundaiðkunin fari fram á skólaárinu 2020–2021. Athugið að hægt er að koma með kvittanir fyrir íþrótta- og tómstundastarfi sem greitt var fyrir í upphafi skólaárs eða frá hausti 2020.
Sveitarfélög setja reglur um úthlutun styrkjanna og fyrirkomulag getur verið breytilegt á millisveitarfélaga til dæmis varðandi:
- hvaða íþrótta- og tómstundastarf fellur undir styrkina
- hvaða gögnum beri að skila með umsókn
- afgreiðslutíma umsókna
Fyrirspurnum um styrkina skal beina til viðkomandi sveitarfélags.
Athugasemdir