Sigrún nokkur, íbúi Seljahverfis í Breiðholti lenti í miður skemmtilegu atviki þegar níu drengir réðust inn í stigagang hennar. Drengirnir höfðu hringt dyrabjöllu viðkomandi og sagst vera heimsækja vin sinn sem byggi uppi. Íbúanum þótti það undarlegt þar sem enginn drengur á þeirra aldri byggi uppi og gátu gestirnir heldur ekki sagt til um nafn vinarins.
Reyndi Sigrún að hindra þeim inngöngu og bað þá kurteisislega um að fara en segir að þá hafi lætin byrjað. Hún sagði frá þessu í hópi hverfisbúa á Facebook. „Þeir voru dónalegir, frekir, agressífir, einn sló til mín og þeir neituðu að fara. Það tók mig dágóðan tíma að ná að loka hurðinni og þá þurfti ég að fara upp og ná einum sem hafði komist fram hjá mér og koma honum út. Þeir börðu og spörkuðu í veggina og hurðina á fremri ganginum hjá mér eftir að ég náði að loka og voru þar í dágóðan tíma með brjáluð læti áður en þeir hlupu burtu,“ segir Sigrún.
Vigdís nokkur segist líklega hafa lent í sömu drengjum og þar sem myndavél sé í stigaganginum hjá henni hafi hún náð vídeói af þeim. Segir hún jafn framt að einn hafi hótað henni lífláti ef hún hringdi á lögregluna.
„Í svona atvikum er bara gott að vera inni hjá sér. Ef eitthvað er að gerast sem þarf að stoppa þá er hægt að hringja á lögreglu sem til þjónustu fyrir okkur.
Ungir strákar eru að testa og prófa. Best að standa í útistöðum við einhvern sem er þeim alveg ótengdur,“ skrifar Andri.
Svo virðist sem að minnsta kosti hluti hópsins séu nemendur við Ölduselsskóla.
Athugasemdir