„Ég er svo triggered yfir að það sé í lagi að loka fólk inni undir eftirliti ríkisins og að það sé bara stór hópur fólks að garga að það eigi að loka landamærunum hérna, af því það er heimsfaraldur. Held það verði stórkostlega erfitt að vinda ofan af þessari stemningu.“
Þetta skrifar Katrín Atladóttir, borgarfulltrúi Sjálfstæðisflokksins, á Twitter en óhætt er að segja að ummælin hafi fallið í grýttan jarðveg. Fjöldi fólks lætur hana heyra það á Twitter en flestir saka hana um gífurlega hræsni. Hún er sögð láta eins og Sjálfstæðisflokkurinn sé ekki í ríkisstjórn. Aðrir benda á að hún virðist ekki hafa haft áhyggjur af þessu þegar flóttamenn áttu í hlut.
Þórunn Ólafsdóttir, stofnandi samtakanna Akkeri sem starfa í þágu flóttamanna, skrifar til að mynda „Svona eins og á Ásbrú?“. Því svarar Katrín: „Hugsaðu þér allan stuðninginn sem fólk sem áður vildi loka landamærunum fyrir ákveðnum hópi fólks er búinn að fá. Með því að halda áfram hræðsluáróðri gagnvart hinu ýmsa frá útlöndum er hægt að viðhalda þessari stemningu lengi.“
Því svarar Þórunn: „Er ekkert að lýsa yfir neinum stuðningi við landamæralokanir. Finnst bara áhugavert að sjá hvað áhugi margra á ferðafrelsi og landamæratakmörkunum er mismikill eftir því hvaða hópar eiga í hlut.“
Fleiri gagnrýna þetta. „Stjórnmálaflokkurinn þinn er búinn að standa vörð um lokuð landamæri og einangrun fyrir sumt fólk sem ekki þykir þóknanlegt áratugum saman. Ég hef meiri áhyggjur af því öllu heldur en að það verði vesen að vinda ofan af lokunum þegar fer að fjara undan covid,“ skrifar tónlistarmaðurinn Björn Kristjánsson.
Heiða nokkur segir þessa afstöðu áhugaverða í ljósi þess í hvaða flokki Katrín er. Katrín ver sig og segir: „Það hefur aldrei verið stærri hópur Íslendinga sem vill loka landamærum vegna utanaðkomandi ógnar. Mér finnst það áhyggjuefni. Ég hef mínar eigin skoðanir.“ Þá skýtur Heiða þessi fast til baka: „Þetta er bókstaflega stefna ríkisstjórnar Bjarna Benediktssonar sem er formaður flokksins þíns. En það er náttúrulega þægileg vel borguð innivinna að vera borgarfulltrúi.“
Sóley Tómasdóttir, fyrrverandi borgarfulltrúi VG, skammar hana svo fyrir að nota orðið „triggered“. „Sjálfstæðisflokkurinn hefur staðið fyrir lokuðum landamærum og innilokun afmarkaðra hópa sem hingað koma um árabil. Og þessi notkun á “triggered” er óviðeigandi, nema þú sért með áfallastreitu vegna skerts ferðafrelsis eða innilokunar,“ skriar Sóley.
Athugasemdir