Halla hætti að leika og fór í Oxford

Hin 39 ára gamla Halla Vil­hjálms­dóttir, eða Halla Koppel, eins og hún heitir nú, muna eflaust margir eftir.

Halla er mennt­aður leik­ari og var um ára­bil afar áber­andi í íslensku leik­list­ar­sen­unni. Hún lék til að mynda í kvik­mynd­inni Astrópíu, fór með aðal­hlut­verk í söng­leiknum Footloose sem settur var upp í Borg­ar­leik­hús­inu árið 2006, lék í ára­mótaskaup­inu sama ár og var kynnir í fyrstu seríu X-Factor á Íslandi.

Und­an­farin ár hefur Halla hins vegar búið, starfað og stundað nám í Bret­landi. Hún er gift Harry Koppel sem er kól­umbískur, en alinn upp að miklu leyti á Englandi. Saman eiga þau þrjú börn, Louisa sem er fædd 2015 og Harry Þór, sem fæddur er 2017 og Anitu sem fædd­ist á síð­asta ári.

Óhætt er að segja að Halla hafi aldeilis ekki setið auðum höndum síð­ustu ár, því fyrir utan það að ganga með og eign­ast þrjú börn, hefur hún lokið MBA gráðu í Oxford háskóla og er nú að taka próf frá Cambridge í sjálf­bærum fjár­málum og fjórða stig í CFA sem snýst að miklu leyti um umhverf­is­vænni og sjálf­bær­ari fjár­fest­ingar.

Halla hefur að und­an­förnu starfað hjá amer­íska fjár­fest­inga­bank­anum Goldman Sachs í London, en hún sagði upp starfi sínu fyrir nokkrum mán­uðum, til þess að geta sinnt börnum sínum.

„Í mínum bransa er ekki óeðli­legt að vera komin í vinn­una fyrir sjö og fara heim klukkan átta. Það kom tíma­bil þegar ég eign­að­ist fyrsta barn­ið mitt að ég sá hana í korter. Ég var farin til vinnu áður en hún vakn­aði og hljóp eins hratt og ég gat heim úr lest­inni til að ná að sjá hana í korter áður en hún færi að sofa. Ég kom heim sveitt, silki­blússan límd við bakið á mér, hljóp upp stig­ann því það var fljót­ara en að bíða eftir lest­inni. Það tókst oft ekki og barn­fóstran reyndi að hugga mig með því að hún hefði verið svo þreytt að hún hefði bara sofnað. Þetta var ömur­legt. Ég tók ákvörðun um að bjóða ekki upp á þetta,“ sagði Halla í helg­ar­við­tali DV fyrir skemmstu.

Halla virð­ist skara fram úr í öllu því sem hún tekur sér fyrir hendur og verður spenn­andi að fylgj­ast með henni í fram­tíð­inni og sjá hvert hennar næsta verk­efni verður. Því ljóst er að hér er kona sem lætur sér ekk­ert vaxa í augum.