Stóra brjóstamálið sem kom upp á dögunum virðist nú hafa fengið farsæla lausn. Nú er ljóst að starfsmenn Sky Lagoon munu ekki lengur gera greinarmun á kynjum varðandi hvaða sundföt þyki við hæfi.
Allt uppnámið hófst þegar Diljá Sigurðardóttur var vísað upp úr lóninu á laugardaginn fyrir að vera ber að ofan.
Diljá er ákveðin og vill með því að fá að vera ber að ofan eins og henni sýnist gengisfella geirvörtur og brjóst kvenna sem eitthvað sem mögulegt sé að nota gegn þeim; sérstaklega í tengslum við stafrænt kynferðisofbeldi sem farið hefur vaxandi hér heima og um allan heim á undanförnum árum.
Diljá hefur nefnt að geirvörtur kvenna séu álitnar kynferðislegar og samfélagslegt fyrirbæri, en ekki líffræðilegt.
Sky Lagoon sendi frá sér yfirlýsingu um málið og þar segir meðal annars:
„Eftir að hafa skoðað málið betur komumst við að þeirri niðurstöðu að túlkun viðkomandi á skilmálum okkar átti rétt á sér. Við viljum því þakka henni fyrir að vekja athygli okkar á þessu,“ en undir yfirlýsinguna ritar Dagný Pétursdóttir, framkvæmdastjóri Sky Lagoon og bætir við:
„Við viljum því þakka henni fyrir að vekja athygli okkar á þessu. Ekki verður gerður greinarmunur á kynjum um hvað séu fullnægjandi sundföt hjá Sky Lagoon.“
Athugasemdir