Í dag héldu bólusetningar barna á aldrinum 12-15 ára, gegn Covid-19, áfram í Laugardalshöll. Biðu foreldrar í röðinni með misstressuðum börnum sínum er maður á miðjum aldri byrjaði að öskra yfir hópinn. Hrópaði hann meðal annars yfir hópinn að verið væri að „sprauta manngerðum efnavopnum“ í börnin.
Þá fullyrti maðurinn að 70 prósent þeirra sem fái bólusetningu gegn Covid-19, fái blóðtappa sjö dögum eftir bólusetninguna. Nokkrir feður sögðu honum að hætta þessu og að þetta væri nógu erfitt fyrir börnin hvort eð er og einn sagði honum þá sjálfum að sleppa bólusetningu en fara.
Þegar ekki dugði að segja manninum að fara og hætta þessu steig fram faðir drengs sem var á leið í bólusetningu, veittist að mótmælandann og lét hann heyra það óþvegið. Var honum ansi heitt í hamsi en sagði hann manninum ítrekað að „drulla sér í burtu.“ Faðirinn hækkaði svo róminn og sagði „drullaðu þér fokking heim helvítis fíflið þitt“ og byrjaði svo að ýta við honum. Að lokum vísaði lögreglan mótmælandanum á brott. Rúv birti myndband af atvikinu.
Athugasemdir