Kona, sem önnu kona braut á kynferðislega, hefur ekki stigið fæti á Höfn síðan brotið átti sér stað. Systir bæjarstjórans er gerandinn í málinu.
Mikil óværð er á Hornafirði vegna máls sem snýr að kynferðislegri áreitni konu á hendur annarri konu. Á fimmudaginn féll dómur í málinu, sem upp kom vorið 2019. Gerandinn hefur fengið að starfa óáreittur hjá bænum frá því að atvikið átti sér stað en þolandinn hrökklaðist frá. Samkvæmt áreiðanlegum heimildum Mannlífs er gerandinn systir Matthildar Ásmundardóttur, bæjarstjóra sveitafélagsins Hornafjarðar og var framkvæmdarstjóri hjá sveitarfélaginu þegar brotið átti sér stað. Samkvæmt heimildum Mannlífs var ráðning systur bæjarstjórans nokkuð umdeild á Höfn en viðmælendur Mannlífs kannast ekki við að staðan hafi verið auglýst. Var hún ráðin af sveitarfélaginu þegar Matthildur var orðinn bæjarstjóri en síðan þá hefur einkafyrirtæki tekið yfir rekstur stofnunarinnar. Hún vinnur þar enn.
Konan var sakfelld fyrir kynferðislega áreitni gegn annarri konu en atvikið átti sér stað í rúmi á hótelherbergi við Rauðarárstíg er kvennahópur frá Hornafirði fór í vinnuferð til Reykjavíkur. Báðar konurnar voru starfsmenn sveitarfélagsins. Var konan dæmd í tveggja mánaða skilorðsbundið fangelsi vegna brotsins, sem skilgreint er sem kynferðisleg áreitni, og til greiðslu 450.000 króna í skaðabætur auk málskostnaðar.
Í samtali við Mannlíf segir manneskja sem ekki vill láta nafn síns getið en tengist málinu, að málið hafa verið afar erfitt fyrir þolandann. „Þegar þetta mál kemur upp, þá er bara allt mjög subbulegt í kringum það skilurðu, brot er bara brot og það er svo allt annar handleggur, búið að dæma í því. En það er þessi vinnsla í þessu máli, hún veldur því að brotaþolinn hefur ekki stigið fæti sínum á Höfn eftir þetta nema að hún fór þangað um miðja nótt til að taka saman dótið sitt. Þetta var bara ömurleg staða að vera í.“
Matthildur Ásmundardóttir neitaði að tjá sig að svo stöddu er Mannlíf falaðist eftir viðbrögðum.
Dv fjallaði fyrst um málið.
Athugasemdir