Sagan um titla nýju ráðherra ríkisstjórnarinnar virðist vera hin endalausa.
Þegar ný ríkisstjórn Vinstri grænna, Sjálfstæðisflokks og Framsóknarflokks var kynnt á Kjarvalsstöðum um síðustu helgi voru titlar margra ráðherranna kynntir öðruvísi en þeir hafa svo ratað á vef stjórnarráðsins. Eitthvað var um misræmi; eitt nafn á ráðuneyti var notað fyrr um daginn og annað seinna.
Áslaug Arna Sigurbjörnsdóttir var í upphafi sögð ráðherra nýsköpunar, iðnaðar og háskóla. Á vef stjórnarráðsins er hún nú titluð sem vísinda-, iðnaðar- og nýsköpunarráðherra. Háskólarnir á bak og burt úr titlinum.
Ásmundur Einar Daðason var kynntur sem skóla- og barnamálaráðherra en er nú skráður mennta- og barnamálaráðherra á vefnum.
Lilja Alfreðsdóttir var ýmist sögð viðskipta- og menningarmálaráðherra eða ferðamála-, viðskipta- og menningarmálaráðherra. Hið síðarnefnda, og lengra, virðist hafa orðið ofan á ef marka má vef stjórnarráðsins.
Svandís Svavarsdóttir var sagður nýr ráðherra í ráðuneyti matvæla, sjávarútvegs og landbúnaðar. Nú er titillinn hinsvegar örlítið styttri; sjávarútvegs- og landbúnaðarráðherra.
Guðlaugur Þór Þórðarson fékk kynninguna „ráðherra umhverfis- og loftslagsmála“ en heitir nú umhverfis-, orku- og loftslagsráðherra.
Jón Gunnarsson var ýmist sagður dómsmálaráðherra eða innanríkisráðherra. Formlegur titill er þó innanríkisráðherra – dómsmálaráðuneytið fellur því inn í endurvakið innanríkisráðuneyti.
Sigurður Ingi Jóhannsson er nýr innviðaráðherra. Undir þann hatt falla húsnæðis-, sveitastjórnar-, samgöngu- og skipulagsmál.
Guðmundur Ingi Guðbrandsson hefur ýmist verið titlaður félags- og vinnumálaráðherra eða félags- og vinnumarkaðsráðherra. Ekki svo mikill munur þar á, en það síðarnefnda hefur hrósað sigri á vef stjórnarráðsins.
Örfá ráðuneyti hafa haldið eldri og ívið þjálari nöfnum sínum. Það er forsætisráðuneytið, fjármála- og efnhagsráðuneytið, utanríkisráðuneytið og heilbrigðisráðuneytið.
Djamm- og þynnkumálaráðherra
Leikarinn og uppistandarinn Vilhelm Neto gerði grín að hringavitleysu hinna óþjálu titla ráðherranna á Instagram-reikningi sínum á dögunum.
Í myndbandinu bregður hann sér í hlutverk hinna ýmsu ráðherra og kynnir sig meðal annars sem síma- og internetmálaráðherra, mjólkurmálaráðherra, landbúnaðar- og geimverumálaráðherra og djamm- og þynnkumálaráðherra.
Athugasemdir