Arna Schram, sviðsstjóri hjá Reykjavíkurborg og fyrrverandi formaður Blaðamannafélags Íslands, lést á Landspítalanum í gær aðeins 53 ára að aldri.
Arna var fædd þann 15.mars árið 1968 í Reykjavík þar sem hún ólst upp. Foreldrar Örnu eru Ellert B Schram,fyrrverandi ritstjóri og þingmaður og Anna Guðlaug Ásgeirsdóttir tölvuritari.
Arna útskrifaðist sem student frá MR árið 1988 og lauk BA-gráðu í stjórnmálafræði og heimspeki frá HÍ og Kaupmannahafnarháskóla. Auk þess lauk hún MBA-gráðu með áherslu á stjórnun, rekstur og markaðsmál frá HR.
Arna starfaði lengi við blaðamennsku og var hún ung þegar hún hóf störf hjá DV. Þaðan lá leið hennar til Morgunblaðsins þar sem hún vann til ársins 2006. Var hún blaðamaður á innlendri fréttadeild. Þá var hún lengi vel þingfréttaritari en einnig kvöldfréttastjóri og pistlahöfundur. Arna var aðstoðarritstjóri Króníkunnar og fréttaritstjóri Viðskiptablaðsins og um skeið starfaði hún við HR og gegndi formannsstöðu Listdansskóla Íslands.
Arna hóf störf sem upplýsingafulltrúi Kópavogsbæjar árið 2010 en frá 2017 var hún sviðsstjóri menningar-og ferðamálasviðs Reykjavíkurborgar.
Arna sinnti trúnaðarstörfum fyrir Blaðamannafélag Íslands. Hún var varaformaður þar í tvö ár og formaður í fjögur auk þess sat hún í fjölmiðlanefnd sem fulltrúi BÍ.
Arna lætur eftir sig eina dóttur, Birnu Ketilsdóttur Schram, fædd árið 1994.
Mannlíf sendir aðstandendum innilegar samúðarkveðjur
Athugasemdir