Snjóflóðahætta á Vestfjörðum og vegum lokað um allt land

Ofsa­veður gengur nú yfir landið og er óvissu­stig vegna sjó­flóða­hættu á Vest­fjörðum.

„Á Vest­fjörðum er spáð aust­an­roki eða ofsa­veðri í kvöld, 21. feb., og nótt með tals­verðri eða mik­illi snjó­komu. Tölu­verður snjór er nú þegar á svæð­inu og hefur skafið mikið í hvössum aust­an­áttum síð­ustu daga. Minni­háttar snjó­flóð féll á Pat­reks­firði aðfara­nótt sunnu­dags, ofan við varn­ar­garð í bygg­ingu, og minni­háttar snjó­flóð féllu einnig í Skut­uls­firði um helg­ina. Óvissu­stigi vegna snjó­flóða­hættu hefur verið lýst yfir á sunnan- og norð­an­verðum Vest­fjörðum. Náið verður fylgst með aðstæðum,“ segir á vef Veð­ur­stofu Íslands.

Veginum um Súða­vík­ur­hlíð og Flat­eyr­ar­vegi verður lokað í kvöld klukkan tíu vegna snjó­flóða­hættu.

„Veginum um Súða­vík­ur­hlíð og Flat­eyr­ar­vegi verður lokað í kvöld, 21. feb kl. 22:00, vegna snjó­flóða­hættu.

Fyrir þá sem mögu­lega gætu komið til Súða­víkur eftir þann tíma og þurfa húsa­skjól í nótt er þeim bent á að hringja í 112 og biðja um sam­band við lög­regl­una á Ísafirði, sem þá myndi leið­beina við­kom­andi,„ segir í til­kynn­ingu frá lög­regl­unni á Vest­fjörðum.

Flestum vegum á Suð­vest­ur­landi hefur verið lokað en Reykja­nes­braut er enn opin, þó eru 38 m/s og krap á vegum.