Salan á hlut ríkisins í Íslandsbanka á dögunum hefur vakið hörð viðbrögð í samfélaginu, hvort tveggja hjá almennum leikmönnum og sérfræðingum. Flestir hafa verið sammála um að þar hafi eitthvað farið úrskeiðis eða salan ekki verið skipulögð nægilega vel, þótt fólk taki misdjúpt í árinni þegar kemur að sökudólgum og umræðu um ásetning.
Í gær var tilkynnt að ríkisstjórnin hyggðist leggja þá tillögu fyrir Alþingi að Bankasýslan verði lögð niður, þar sem ágallarnir hefðu haft með framkvæmd sölunnar að gera og ábyrgðin því þeim megin. Ekki eru allir sammála þeim skýringum ríkisstjórnarinnar og telja sumir að þarna sé verið að henda Bankasýslunni undir rútuna vegna máls sem ríkisstjórnin sjálf beri í raun ábyrgð á.
Bjarni Benediktsson, fjármálaráðherra, hefur verið í eldlínunni vegna málsins. Faðir hans, Benedikt Sveinsson, var einn þeirra sem fjárfestu í hlut í bankanum, eftir að hafa fengið sérstakt boð um að taka þátt. Þetta hefur farið illa í marga og verið mikið til umræðu, til að mynda á fjöldafundi á Austurvelli. Sjálfur segist Bjarni ekki hafa vitað um fyrirætlanir föður síns.
Hvað finnst lesendum um málið? Dugar það til að leggja niður Bankasýsluna, eins og ríkisstjórnin ætlar sér að gera, eða þarf að ganga lengra?
Athugasemdir