Verkalýðsfélag Vestfirðinga harmar hópuppsögn Eflingar: „Þið eruð hetjur sem hafið staðið vaktina“

Stjórn Verka­lýðs­fé­lags Vest­firð­inga harmar í yfir­lýs­ingu, hóp­upp­sögn stjórnar Eflingar á starfs­fólki á skrif­stofu félags­ins á dög­unum.

Í yfir­lýs­ing­unni sem birt­ist á bb.is, tekur stjórn Verka­lýðs­fé­lags Vest­firð­inga undir með ASÍ-UNG um „ósið­lega aðför að grund­vallar rétt­indum vinn­andi fólks“. Þá furðar stjórnin sig á „fram­göngu for­manna SGS og VR/LÍV, sem verja aðför for­manns Eflingar gegn rétt­indum starfs­fólks.“ Segir í yfir­lýs­ing­unni að með því hafi for­menn­irnir brugð­ist grund­vallar skyldum sínum að veita starfs­fólki Eflingar stuðn­ing og skjól, algjör­lega.

Hér má sjá yfir­lýs­ing­una í heild sinni:

Stjórn Verka­lýðs­fé­lags Vest­firð­inga harmar þá ósvífnu ákvörðun Bar­áttu­lista stjórnar Eflingar að segja öllu starfs­fólki á skrif­stofu félags­ins upp störfum. Slíkar aðgerðir eiga að vera algjört neyð­ar­úr­ræði ef hag­ræða þarf í rekstri en ekki til að lækka laun. Stétt­ar­fé­lögum ber skylda til að ganga fram með góðu for­dæmi og þannig tryggja að rétt­indi vinn­andi fólks sé ofar öðrum hags­munum. Velferð starfs­fólks á að vera í fyrsta sæti.

Stjórn Verk Vest tekur undir með ASÍ-UNG um ósið­lega aðför að grund­vallar rétt­indum vinn­andi fólks og lýsir jafn­framt yfir stuðn­ingi við fram­göngu for­seta ASÍ sem hefur komið starfs­fólki Eflingar til varnar á erf­iðum tímum.

Jafn­framt furðar stjórn félags­ins sig á fram­göngu for­manna SGS og VR/LÍV sem verja aðför for­manns Eflingar gegn rétt­indum starfs­fólks.  Með þeim hætti hafa for­menn SGS og VR/LÍV algjör­lega brugð­ist grund­vallar skyldum sínum að veita starfs­fólki Eflingar stuðn­ing og skjól í þeirri for­dæma­lausu aðför gegn rétt­indum þeirra sem unnar eru af hálfu nýrrar for­ystu Eflingar stétt­ar­fé­lags. Með fram­göngu sinni hafa þeir einnig brugð­ist verka­lýðs­hreyf­ing­unni sem leið­togar tveggja stærstu land­sam­band­anna innan ASÍ.

Stjórn Verk Vest tekur því enn og aftur undir með for­seta ASÍ að vinn­andi fólk á Íslandi eigi þá sjálf­sögðu kröfu að við sem störfum fyrir verka­lýðs­hreyf­ing­una komum fram sam­einuð og forð­umst að týn­ast í eigin ágrein­ingi sem oft og tíðum fjallar um völd, per­sónur og leik­endur.

Stjórn Verk Vest sendir starfs­fólki Eflingar stuðn­ings og bar­áttu­kveðjur, þið eruð hetjur sem hafið staðið vakt­ina fyrir félags­menn Eflingar þrátt fyrir ítrekað aðkast og ósvífni af hálfu nýrrar for­ystu félags­ins.