Marteinn Óli Aðalsteinsson, bóndi í Klausturseli á Efri-Jökuldal keypti með konu sinni fyrir skemmstu matarvagn. Þau selja samlokur og pylsur til þeirra hundruðu ferðamanna sem heimsækja Stuðlagil á degi hverjum yfir sumartímann.
„Viðtökurnar hafa verið mjög góðar þessar þrjár vikur sem við höfum haft opið,“ segir Marteinn Óli Aðalsteinsson, bóndi að Klausturseli á Efri-Jökuldal, í viðtali við Austurfrétt.
Er matarvagninn einn af tveimur möguleikum í veitingasölu á svæðinu.
„Næsti veitingastaður við Stuðlagil er Skjöldólfstaðir og það er spottakorn þangað héðan frá. Sérstaklega fyrir þá sem leggja hér við brúna hjá okkur og ganga að þá eru allmargir kílómetrar að gilinu sjálfu og eðli máls samkvæmt verður fólk svangt á þeirri löngu leið,“ útskýrir Marteinn.
Næstu skref þeirra hjóna er að tryggja klósettaðstöðu á svæðinu en hana sárvantar.
„Það er klósettaðstaða hér á Grund sem er hvað næst gilinu sjálfu en við höfum orðið töluvert vör við fyrirspurnir um slíka aðstöðu hér hjá okkur og við erum að vinna að því þessa dagana. Það hins vegar meira en að segja að koma upp slíkri aðstöðu. Það kostar alls kyns vesen en við auðvitað viljum að gestum líði vel og fái þjónustu og það verður komið á koppinn innan tíðar.“
Athugasemdir