Katrín Jakobsdóttir forsætisráðherra stendur í ströngu þessa dagana vegna hælisleitendamála en í gær nýtti hún stund milli stríða og fundaði með Hinsegin félagsmiðstöðinni.
Katrín tók á móti sex ungmennum frá Hinsegin félagsmiðstöðinni og sagði samtalið við þau áhrifamikið, í færslu sem hún skrifaði á Facebook en færslan vakti gríðarmikla athygli enda um að ræða málefni sem þarft er að ræða:
„Sumir fundir sitja lengur með manni en aðrir – þannig fund átti ég í dag. Þá fékk ég heimsókn frá Hinsegin félagsmiðstöðinni og átti áhrifamikið samtal við sex ungmenni sem öll eiga það sameiginlegt að sækja starfið þar.
Það var ekki gott að hlusta á lýsingar þeirra af hatursfullri framkomu og orðræðu sem þau lenda öll í vikulega, stundum daglega og hefur staðið yfir í marga mánuði. Þau lýsa breytingu á viðhorfum í garð hinsegin fólks sem er umfangsmikil og alvarleg – og ekki síður alvarlegt er að við höfum ekki tekið nægilega fast á móti þessari þróun, ekki staðið nægilega þétt við bak hinsegin barna og ungmenna. Nú þurfum við öll að taka höndum saman; stjórnvöld munu grípa til aðgerða sem munu m.a. byggjast á tillögum hóps um leiðir til að sporna við hatursorðræðu sem mun skila af sér von bráðar. Það er þörf á fræðslu fyrir okkur öll: börn, foreldra, skólasamfélagið, stjórnvöld og stofnanir. Hinsegin ungmenni eiga að fá að upplifa öryggi, eiga sitt daglega líf og æsku laus við ótta og árásir.“
Athugasemdir