Jón Gunnarsson dómsmálaráðherra ætlar leggja fram frumvarp til breytinga á áfengislögum; vill afnema bann við heimabruggun á áfengi til einkaneyslu.
Áform voru kynnt á samráðsgátt stjórnvalda í dag, en áfram verður þó óheimilt að framleiða áfengi með eimingu.
Kemur fram í greinargerð að almenningur sé lítt upplýstur um að heimabruggun áfengis til einkaneyslu sé refsiverður verknaður, og þá hafa félög verið stofnuð utan um heimabruggun og námskeið auglýst opinberlega, og því sé nú tímabært að endurskoða þessi lög:
„Þarna er nú verið að gera það löglegt sem er stundað mjög víða á heimilum að brugga sitt léttvín, sitt berjavín eða hvað annað sem fólk er að brugga til einkanota. Það er ólöglegt samkvæmt lögum. Þannig að við erum að lögleiða það sem augljóslega hefur verið upp í áratugi. Þannig að þetta er að þessu leyti lagabæting eða hreinsun,“ sagði Jón Gunnarsson dómsmálaráðherra í samtali við ruv.is.
Jón segir að ansi margir átti sig ekki á því að heimabrugg sé ólöglegur gjörningur:
„Meira að segja lögfræðingar sem eru í kringum mig. Menn spurðu, er þetta ekki örugglega löglegt? Nei það er nú ekki þannig. Þetta er ólöglegt og úr því ætlum við að bæta,“ segir Jón.
Athugasemdir