Samfylkingin er í gríðarlegri sókn undir stjórn Kristrúnar Frostadóttur og Guðmundar Árna Stefánssonar; mælist langstærsti flokkur landsins; og nú hefur Samfylkingin kynnt verkefnalista fyrir þinglok.
„Þetta eru þrjú einföld verkefni sem er hægt að fara í strax og sem munar virkilega um á tímum mikillar verðbólgu og vaxtahækkana. Fleira þarf að gera en þetta eru allt aðgerðir sem sitjandi ríkisstjórn ætti að geta fallist á, miðað við hvernig ráðherrarnir tala að minnsta kosti. Og þess vegna leggjum við þær fram núna,“ segir Kristrún Frostadóttir, formaður Samfylkingarinnar.
„Öll þessi verkefni eru fjármögnuð að fullu — og meira en það — með því að loka skattaglufu sem kallast ehf.-gatið. Í allan vetur höfum við í Samfylkingunni kallað eftir aðgerðum. Til að vinna gegn verðbólgu og verja heimilisbókhaldið hjá fólki. Við höfum stundað jákvæða pólitík, sett fram lausnir og lagt ofuráherslu á efnahags- og velferðarmálin. Sem sést kannski best á því að við höfum haft það sem viðmið að gera ekki tillögu um eina krónu í útgjöld án þess að tvær krónur komi á móti til að vinna gegn verðbólgu,“ segir Kristrún.
Athugasemdir