Einar Guttormsson íbúi í Seljahverfi í Breiðholti birti færslu á Facebook og vakti athygli á að fjarlægðar voru körfuboltaspjöldin á skólalóð Seljaskóla sökum hávaðakvartana nágranna skólalóðarinnar:
„Sjaldan hef ég orðið vitni að annari eins vitleysu! 🙁
Nú er verið að fjarlægja körfuboltakörfurnar við Seljaskóla annað sumarið í röð! Þegar ég talaði við strákana sem voru að fjarlægja þær þá sögðu þeir að vegna kvartana nágranna hefði borgin ákveðið að taka þær niður!“
Einar segir það táknrænt að valinn hafi verið sjálfstæðisdagurinn 17. júní til að fjarlægja spjöldin:
„Þegar allir eiga að vera úti að gleðjast sumrinu en staðinn er kannski best að allir sitji heima í símanum sínum og láti aðra sjá um fagnaðarlætin langt frá öllum öðrum!“
Býr í næsta húsi við skólann
Einar segir að hann búi hvað næst skólanum og hann hafi verið meðvitaður um hvað staðsetning og nálægðin við skólalóðina þýddi:
„Líf og fjör, hróp og gleði! En nú á að koma í veg fyrir það! Það er sem sagt ekki ætlast til að krakkar leiki sér úti á sumrin!“
Húsvörður óskaði eftir niðurtöku
Aðrir íbúar Seljahverfis hafa ritað undir færsluna. Ein þeirra segist hafa rætt við verktakann og síðar húsvörð skólans:
„Höfðum samband við Guðna sem segir að vegna kvarta um hávaða frá nágrönnum sé krafa um að körfur sé teknar niður. Að þetta sé mál sem hafi ratað fyrir borgarráð og þeir hafi enga kosti en að taka körfurnar niður. Næsta samtal mitt er við formann borgaráðs að ræða faglegri lausn á málinu. Setja upp körfurnar enda erum við ekki að fjarlægja fótboltamörk. Þetta snertir líf margra og er í stöðugri notkun. Settar verði upp reglur um notkun sé ekki spiluð tónlist eða spilað eftir kl 22 á kvöldin. Sé það ekki virt verði körfur fjarlægðar. Vonast til að ná þessu fram set þetta í fyrsta forgang.“
Íbúar Seljahverfis ósáttir
Fjölmargir hafa lýst yfir óánægju sinni við færsluna og sent inn ábendingu til borgarinnar. Samhljómur íbúanna er að stórfurðulegt sé að hagsmunir fárra eigi að hafa áhrif á öll börn í hverfinu.
Athugasemdir