Íbúar í Fossvoginum kannast vel við innbrotsþjóf sem fékk á síðasta ári viðurnefnið „Fossvogshrellirinn“. Íbúar voru orðnir langþreyttir á innbrotunum en maðurinn var loks dæmdur í fimm mánaða fangelsi þann 10. júlí síðastliðinn. Íbúar í Fossvogi höfðu margir orðið varir við Fossvogshrellinn og höfðu nokkrir þeirra birt af honum mynd á Facebook-síðu hverfsins til þess að vara nágranna sína við. Í dómi Héraðsdóms kemur fram að maðurinn hafi verið í mikilli neyslu fíkniefna þegar brotin áttu sér stað en er hann sakaður um að hafa stolið miklum verðmætum yfir nokkurra ára tímabil. Er honum gert að sök að hafa stolið rafmagns fjallahjóli, verkfærum, vinnuvélum, gríðarlegu magni af kjöti úr frysti, leikjatölvu auk fjölda annarra verðmæta úr bílskúr en braust hann einnig inn á heimili fólks. Í dóminum segir:
„Þegar ákærði varð lögreglu var fór hann aftur inn í íbúðina, út á stigaganginnog hljóp niður. Lögreglumenn urðu hans varir og spörkuðu upp hurðinni sem skilur að anddyri og stigagang. Lögreglumennirnir mættu ákærða í tröppunum og virtist hann æstur og árásargjarn.Ákærði fékk skýr fyrirmæli um að stöðva og leggjast niður. Hann streittist hins vegar mikið á móti. Átökin bárust upp á 2. hæð og beita þurfti varnarúða en í kjölfarið tókst að koma ákærða í handjárn.“ Í kjölfarið fór lögregla inn íbúðina á 2. hæð þar sem hafði sést til mannsins. Þar voru þrír einstaklingar sem allir voru handteknir en í íbúðinni fannst nokkurt magn fíkniefna auk þýfis. Samkvæmt dómi virðist sá ákærði hafa gloppótt minni sökum neyslu á þessum tíma og lýsir því að á þessum tíma hafi um sjö til átta manns búið á heimili hans og hafi margir þeirra stundað afbrot. Var hann að lokum dæmdur í fimm mánaða fangelsi auk þess að vera sviptur ökuréttindum ævilangt fyrir önnur brot.
Dóminn má lesa í heild sinni hér.
Athugasemdir