Gangandi vegfarendur eru orðnir þreyttir á aðgerðarleysi lögreglunnar varðandi ólöglega lagningu bíla fyrir utan Múlakaffi.
Íbúar Háaleitishverfis og aðrir gangandi vegfarendur í Ármúla eru orðnir dauðþreyttir en undanfarin ár hafa ökumenn lagt bílum sínum upp á gangstétt við gatnamót Ármúla og Hallarmúla án þess að hugsa sig tvisvar um. Gerir þetta fólki með barnavagna og í hjólastólum ófært að ferðast um svæðið á eðlilegan máta. Þykir ástandið verst í hádeginu á virkum dögum þegar bílstjórar sækja þjónustu á veitingastaðinn Múlakaffi en staðurinn er til húsa á horni Hallarmúla og Ármúla.
Samkvæmt heimildum Mannlífs eru bílarnir sem leggja þarna aldrei sektaðir þrátt fyrir að tilkynnt sé um þá til lögreglu eða Reykjavíkurborgar. Þá þyki fólki sérstakt að svo sé raunin þar sem lögreglumenn eru fastgestir á staðnum og ættu auðveldlega að koma auga á lögbrotin fyrir utan Múlakaffi. Blaðamaður Mannlífs heimsótti götuhornið tvo mismunandi daga til að kanna ástandið og sá báða daga marga bíla sem var greinilega lagt ólöglega. Þá varð blaðamaður vitni að þremur lögreglumönnum að labba framhjá bílunum án þess sekta þá.
Mannlíf sendi fyrirspurn á Árna Friðleifsson, aðalvarstjóra í umferðardeild, varðandi málið og mynd af bílunum sem var lagt ólöglega. Hann sagist eiga erfitt með að svara spurningum Mannlífs þar sem hann hafi ekki sjálfur verið á vettvangi.
Þá hafði Mannlíf heimildir fyrir því að Lögreglan á höfuðborgarsvæðinu ætti í viðskiptasambandi við Múlakaffi. Því var send fyrirspurn á fjármáladeild lögreglunnar til að spyrja út í það samband. Í svari var staðfest að lögregluembættið ætti vissulega í viðskiptasambandi við veitingastaðinn en máltíðir lögreglumanna á Múlakaffi eru niðurgreiddar og þurfa lögreglumenn aðeins að greiða um það bil 40 prósent af uppsettu verði. Þó skal tekið fram að lögreglan á í slíku viðskiptasambandi við fleiri veitingastaði.
Athugasemdir