Sema Erla Serdaroglu líkir ríkisstjórn Katrínar Jakobsdóttur við stjórn Hermanns Jónassonar sem vísaði Gyðingum úr landi á tímum nasismans í Þýskalandi.
„Það er verið að fremja þjóðarmorð í Palestínu. Á sama tíma er á Íslandi flóttafólk frá Palestínu, meðal annars Gaza, sem hefur á síðustu dögum fengið neitun um alþjóðlega vernd hér á landi. Þessa dagana er einnig verið að brottvísa fólki frá Palestínu, sem kom hingað í leit að skjóli, úr landi. Fjöldi barna og fullorðinna bíða sömu örlaga á sama tíma og verið er að drepa fjölskyldur þeirra á Gaza.“ Þannig hefst Facebook-færsla Semu Erlu Serdaroglu, aðjúnkt á Menntavísindasviði Háskóla Íslands og stofnanda Solaris hjálparsamtakanna. „Þessa dagana er einnig verið að brottvísa fólki frá Palestínu, sem kom hingað í leit að skjóli, úr landi. Fjöldi barna og fullorðinna bíða sömu örlaga á sama tíma og verið er að drepa fjölskyldur þeirra á Gaza. Á Íslandi er flóttafólk frá Palestínu sem hefur verið svipt allri þjónustu og er heimilislaust og án allra bjarga og baklands, á götunni í íslensku samfélagi, ófært um að uppfylla grunnþarfir sínar. Á næstu dögum verða það örlög fleira flóttafólks frá Palestínu. Á sama tíma og verið er að stunda þjóðernishreinsanir í heimalandi þeirra.“
Sema Erla segir það ekki rétt að erfitt sé að ná Palestínufólki frá Gaza, því að á síðustu dögum hafi fjölmörgum þeirra tekist að komast yfir landamærin yfir í Egyptaland og þaðan til landa á borð við Ástralíu, Bretlands, Bandaríkjanna, Noregs og Svíþjóðar. Segir hún að íslensk stjórnvöld eigi að gera mun betur. „Íslensk stjórnvöld eiga að veita öllu flóttafólki frá Palestínu sem þegar er á landinu vernd án tafar og stöðva allar fyrirhugaðar brottvísanir á palestínsku flóttafólki. Stjórnvöld eiga líka að hætta að draga lappirnar og sækja fjölskyldur þeirra til Gaza strax. Áður en það verður of seint.“
Líkir Sema Erla að lokum ríkisstjórn Katrínar Jakobsdóttur við stjórn Hannesar Jónassonar en á við Hermann Jónasson, sem vísaði gyðingum úr landi rétt fyrir seinni heimstyrjöldina. „Áður en þessi ríkisstjórn Katrínar Jakobsdóttur fer í sögubækurnar á svipaðan hátt og stjórn Hannesar Jónassonar, og verður fyrst og fremst minnst sem ríkisstjórnarinnar sem gerði ekkert til þess að koma fólki undan þjóðernishreinsunum, ítrekuðum fjöldamorðum og stríðsglæpum og voru þar með samsek þjóðarmorði í Palestínu!“
Hér fyrir neðan má sjá færsluna í heild:
Athugasemdir