„Nú er mikið skrifað og býsnast yfir meintum svikum og þjófnaði Ingu Sæland og Flokki fólksins. Öll þau ógeðslegu skrif eru rógur öfundarfólks,“ skrifar Birgir Dýrfjörð, fyrrverandi varaþingmaður Alþýðuflokksins, í aðsendri grein á Vísi þar sem hann grípur til varna fyrir Ingu Sæland og Flokk fólksins í styrkjamálinu.
Morgunblaðið hefur farið mikinn í málinu og gefið til kynna að Flokki fólksins sé skylt að endurgreiða þær 240 milljónir sem hann fékk í ríkisstyrki þrátt fyrir að vera ekki formlega skráður sem stjórnmálasamtök.
„Skatturinn leiðbeindi Ingu“
Blaðið er með uppslátt í málinu þar sem fullyrt er að Skatturinn hafi leiðbeint Ingu varðandi skráningu flokksins en því hafi ekki verið sinnt. Fyrirsögnin er Skatturinn leiðbeindi Ingu. Þar segir að Flokkur fólksins hafi sendt Skattinum tilkynningu um breytta skráningu sem stjórnmálasamtök í lok janúar 2024, einmitt þegar verið var að greiða út ríkisstyrki til stjórnmálaflokka. Tilkynningunni var hins vegar verulega ábótavant, svo Skatturinn gerði athugasemdir við hana og leiðbeindi flokknum um úrbætur. Flokkurinn hafi enn ekki brugðist við því. „Baldvin Örn Ólason, verkefnastjóri hjá flokknum og sonur Ingu Sæland, formanns hans, átti í bréfaskriftum við Skattinn vegna þessa og sagði að úr þessu yrði bætt eftir breytingar á flokkssamþykktum á landsfundi, sem haldinn yrði „bráðlega“. Hann hefur enn ekki verið haldinn og ekki hefur verið gerð önnur tilraun til þess að breyta skráningunni,“ segir í Morgunblaðinu.
Svik Sjálfstæðisflokksins
Birgir rifjar upp í grein sinni í Vísi að miðstjórn Sjálfstæðisflokksins hélt fund og samþykkti að endurgreiða 165 milljónir sem flokkurinn þáði ólöglega af athafnamönnum.
„Samkvæmt reikningum ríkisendurskoðunar hefur þó verið tregt um efndir. Fyrir mörgum árum tilkynnti flokkurinn svo að hann væri hættur við að vilja endurgreiða gjafirnar. Þannig kastaði Sjálfstæðisflokkurinn syndum sínum bak við sig, – og sér þær ekki meir,“ skrifar Birgir.
Hann segir að „glæpur Flokks fólksins“ eigi að vera sá að veita viðtöku fé frá Fjármálaráðuneytinu án þess að vera á skrá sem stjórnmálaflokkur og rifjar upp lög um starfsemi stjórnmálasamtaka og kemst að því að svokallaður meintur þjófnaður Flokks fólksins beri öll einkenni þess að vera í „algjöru og vel skiljanlegu grandaleysi“.
„Ráðherra getur ekki afsakað sig“
Birgir segir að ef sé að ræða refsivert athæfi þá beri aðrir þar stærri sök og meiri ábyrgð en Inga Sæland. Til dæmis Efnahags-og fjármálaráðuneyti sem létu rétta henni athugasemdalaust alla þessa peninga. Hann bendir á að fjármálaráðherra Sjálfstæðisflokksins beri ábyrgð á málinu.
„Ráðherra getur ekki afsakað sig með því að hafa við sömu aðstæður látið sinn eigin flokk hafa hátt á annað hundrað milljónir án þess að mega það, eins og skilja má af Morgunblaðinu þessa dagana,“ skrifar Birgir.
Í lok greinarinnar, Er Inga Sæland þjófur?, tekur Birgir fram að hann sé ekki félagi í Flokki fólksins.
Athugasemdir