Kötturinn Óskar er kominn í faðm fjölskyldu sinnar eftir að hafa verið týndur síðastliðinn fimm ár.
Sjálfboðaliðasamtökin Villkettir á Suðurlandi sagði frá þeim gleðifréttum í gær að köttur sem samtökin höfðu fundið í fyrra og nefnt Kölska, hafi reynst vera kötturinn Óskar, sem týndist árið 2020. Fjölskylda hans hafði leitað hans stanslaust á sínum tíma án árangur og töldu hann dauðann.
Þegar samtökin auglýstu eftir nýjum eiganda fyrir Kölska fengu þau tölvupóst frá fyrri eiganda kattarins sem þekkti hann af veiðihárunum og sérstökum tám. „Það var tilfinningaþrungin stund og yndisleg þegar hann hitti fólkið sitt og fékk að fara heim,“ segir í tilkynningu Villikatta Suðurlandi á Facebook.
Hér má lesa hina fallegu fréttatilkynningu samtakanna:
„Ein gleðifrétt af Suðurlandi – þið sem hafið týnt kisunum ykkar. Það er alltaf von, segjum við oft. Í september 2024 náðum við kisu á Hellu sem við gáfum það fallega nafn Kölski. Hann virkaði sem ansi mikill villingur á okkur. Í gær auglýstum við loksins eftir nýju heimili fyrir hann. Enda tekið stórstígum framförum undanfarið og sýnt allar sínar fegurstu hliðar. Í dag fengum við, okkur að óvörum, póst frá fyrri eiganda. Kölski eða Óskar eins og hann hét áður hafði týnst árið 2020 og var búið að leita stanslaust að honum án árangurs. Hann var talinn af.
Hann þekktist á fallegu veiðihárunum sínum og sérstökum tásum og samanburður á myndum leyndu því ekki að þetta var Óskar.
Það var tilfinningaþrungin stund og yndisleg þegar hann hitti fólkið sitt og fékk að fara heim.
Elsku Kölski þetta gladdi okkur svo mikið. Myndirnar sýna hvernig hann var þegar við fundum hann og önnur sem sýnir hvað hann er orðinn mikið virðulegur og flottur og mikill kelikarl.“
Athugasemdir