Lögmaðurinn og bóndinn í Flekkudal í Kjós, Sigurður Guðmundsson, lést 10. mars eftir erfið veikindi á Landspítalanum, 67 ára að aldri. Mbl.is segir frá andlátinu.
Sigurður fæddist 10. maí árið 1957 í Reykjavík en foreldar hans voru hjónin Guðmundur Jónsson vélfræðingur, fæddur 27.4. 1932, dáinn 3.2. 2025, og Jóna Gróa Sigurðardóttir, fædd 18.03. 1936, dáin 17.9. 2015, fyrrverandi borgarfulltrúi Reykjavíkurborgar.
Fyrst gekk Sigurður í Laugalækjarskóla, síðan í Réttarholtsskóla, Verzlunarskóla Íslands og lauk svo námi í lögfræði við Háskóla Íslands.
Með námi starfaði Sigurður við ýmislegt, meðal annars hjá Tollvörugeymslunni og sem blaðamaður á Mogganum. Mestan part ævinnar starfaði hann sem sjálfstætt starfandi lögmaður og bóndi í Flekkudal í Kjós en þar sinnti hann hestaræktun og geita- og kindabúskap ásamt sambýliskonu sinni Guðnýju G. Ívarsdóttur, viðskiptafræðingi og fyrrum sveitarstjóra Kjósahrepps og bónda í Flekkudal.
Samkvæmt mbl.is hafa bæði Guðný og Sigurður lagt sitt af mörkum til samfélagsins í Kjós, í gegnum félagsstöf, lögmennsku, sveitarstjórn og með því að stunda hrossarækt með árangri sem tekið var eftir. Þá tók Sigurður að sér ýmis ábyrgðarhlutverk en hann var meðal annars formaður hestamannafélagsins Adams í Kjós í nokkur ár. Einnig var hann í stjórn hestamannafélagsins Harðar í Mosfellsbæ og sinnti nefndarstörfum fyrir Landssamband hestamanna. Aukreitis var hann um tíma í Framtalsnefnd Reykjavíkurborgar.
Sigurður átti börnin Ísak, fæddur 1984 og Aldísi Gróu, fædd 1992, með Lovísu Geirsdóttur leikskólakennara. Guðný átti son úr fyrra sambandi en það er Jóhannes Björnsson, fæddur 1979. Saman eiga þau Sigurður og Guðný níu barnabörn.
Athugasemdir