Ólympíufarinn Berkin Usta lést fyrr í dag eftir að eldur braust út á hóteli í skíðasvæði í Tyrklandi en fjölmiðlar þar í landi greina frá harmleiknum
Eldsvoðinn átti sér stað á Kervansaray-hótelinu og gjöreyðilagði eldurinn hótelið. Tveir létust í eldinum, Usta og faðir hans. Tólf aðrir særðust. Usta var aðeins 24 ára gamall.
Feðgarnir dvöldu á fimmtu hæð hótelsins og sýndi síðasta Instagram-færsla Usta arineld sem sagt er að hafi verið staðsettur í veitingasal hótelsins.
Borgarstjóri Bursa, Mustafa Bozbey, sagði að eldurinn hafi átt upptök sín í mötuneyti hótelsins og að verið væri að rannsaka hvers vegna Usta, faðir hans og nokkrir starfsmenn hótelsins hafi verið á staðnum, þar sem hótelið hafði ekki starfsleyfi.
„Við gerðum úttekt á þessu hóteli í janúar. Við fundum galla og deildum þeim með viðeigandi stofnunum,“ sagði borgarstjórinn.
„Það var tilkynnt að hótelinu hefði verið lokað. Nú er verið að rannsaka hvers vegna þar voru 12 manns inni. Ef hér er um að ræða vanrækslu, þá verður það að koma í ljós.“
Þessi eldsvoði átti sér stað aðeins tveimur mánuðum eftir annan mannskæðan bruna á skíðasvæði í norðvesturhluta Tyrklands, sem kostaði 79 manns lífið.
Usta keppti meðal annars á Vetrarólympíuleikunum 2022 í Peking í Kína. Faðir hans, fyrrverandi skíðamaður, gegndi embætti forseta tyrkneska sambands skíða- og snjóbrettakennara.
Athugasemdir