Verkalýðsforinginn Sólveig Anna Jónsdóttir ritaði færslu fyrr í dag þar sem hún greinir frá fundi sem trúnaðarmaður Eflingar í leikskólans sat og var vægast sagt brugðið.
„Í gær var haldinn fundur vegna mygluvandamála í leikskóla einum. Á fundinum voru stjórnendur, foreldrar, starfsfólk og í það minnsta tveir fulltrúar frá Reykjavíkurborg. Fólk spurði ýmissa spurninga og almennt var upplifunin sú að fulltrúar borgarinnar væru ekki nægilega vel undirbúnir,“ skrifaði Sólveig.
„Á fundinum voru bæði foreldrar og starfsmenn af erlendum uppruna. Einhver þeirra spurðu spurninga á ensku. Sá fulltrúi borgarinnar sem sat fyrir svörum tilkynnti þá að fundurinn færi eingöngu fram á íslensku. Þegar að fundargestir sögðust vera tilbúnir til að túlka var því hafnað af fulltrúa borgarinnar. Að þessum samskiptum loknum hunsaði hann allar spurningar sem að settar voru fram á ensku,“ hélt hún áfram og segir að hegðun þessi sé óásættanleg og starfsfólki leikskólans hafi verið brugðið og hafi upplifað vanvirðingu.
„Þau skilja ekki hversvegna ekki voru túlkar viðstaddir á fundinum. Ég tek undir með þeim. Framkoma umrædds einstaklings sem starfar hjá borginni er til háborinnar skammar. Leikskólar hér í borg eru fjölþjóðlegir. Þar starfar fólk með fjölbreyttan uppruna og þar dvelja börn allsstaðar að úr heiminum. Það er einfaldlega skylda starfsmanna að viðurkenna þessa staðreynd og vinna með fólki, hvort sem það talar íslensku eða ekki. Virðing og vinskapur gagnvart öllu starfsfólki og öllum foreldrum verður að vera til staðar. Annað gengur ekki,“ segir hún svo.
Sólveig heldur áfram og segist vera stolt af trúnaðarmanni Eflingar sem gerði athugasemd við framferði fulltrúa borgarinnar á fundinum og vonar að rætt verði af alvöru við manninn og útskýrt fyrir honum að hann geti ekki mismunað fólki eftir vegna tungumálakunnáttu.
Mannlíf hafði samband við Reykjavíkurborg til að fá viðbrögð við orðum Sólveigar. Samkvæmt borginni er leikskólinn sem um ræðir ekki vegum borgarinnar heldur einkarekinn.
Athugasemdir