Kristinn Hrafnsson skýtur föstum skotum á íslenskt samfélag í nýrri Facebook-færslu.
Ritstjóri Wikileaks, Kristinn Hrafnsson vakti athygli og hneikslun sumra með færslu sem hann birti á Facebook í fyrradag þar sem hann hvatti konurnar í íslenska handknattleikslandsliðinu til þess að neita að spila gegn Ísrael í undankeppni HM. Í dag birtir Kristinn nýja færslu og lætur fylgja skjáskot af frétt um nýjasta fjöldamorð Ísraelshers á Gaza, en minnst 35 voru myrtir í sprengjuárás sem gerð var á íbúðarblokk í gær, börn þar á meðal.
„Þannig enduðu tölur. Á meðan verið var að leika sér með tuðruna á Íslandi í gær voru bræður og systur aðkomuliðsins að slátra íbúðarblokk á Gaza. 35 myrtir, það að segja miðað við líkin sem hafa fundist og verið talin. Fjöldi barna þar á meðal eins og alltaf þegar Ísraelsher dundar sér við að sprengja fjölskyldubyggð. Það er talið að 80 séu enn í rústunum. Ef einhverjir eru enn á lífi fjarar það líf fljótt út enda björgunarliðar með takmarkaðan tækjakost vegna þess að Ísraelar banna hann. Tugir eru á sjúkrahúsi en þar er líka takmörkuð geta.“
Kristinn segir síðan frá hetjunum sem berst við að bjarga lífum þeirra sem náðu að lifa árásirnar af.
„Bráðaliðar og almenningur berst við að bjarga lífum, blaðamenn reyna að segja söguna. Á myndböndum heyrist í drónum ísraelshers voma yfir þeim sem eru að vinna í rústunum í kapphlaupi við tímann. Allir vita að þeir sem stýra drónunum hika ekki við að senda drápssprengjur á þá sem eru að bjarga lífum eða segja okkur fréttirnar. Þeir halda samt áfram.“
Að lokum skýtur ritstjórinn fast á íslenskt samfélag:
„Í kvöld koma nýjar tölur yfir lítil barnslík vafin í lök, í höndum ættingja sem eru yfirbugaðir af sorg.
Helsta sorgin á Íslandi virðist sú að íslenskar ungar konur hafi verið ,,neyddar” til að keppa við systur barnamorðingjanna. Já og sorgin yfir því að einhverjir vogi sér að benda á hræsnina.“
Seinni handknattleikur Íslands og Ísrael fer fram í kvöld á Ásvöllum, Hafnarfirði.
Athugasemdir