Stefán Máni Sigþórsson rithöfundur skaut fast á biskup Íslands, Guðrúnu Karls Helgudóttur, í færslu á samfélagsmiðlinum X.
Biskup Íslands, Guðrún Karls Helgudóttir hvatti landsmenn til að taka afstöðu með börnum, saklausu fólki og friði í predikun í Dómkirkjunni í fyrradag. Minntist hún sérstaklega á stríðsglæpina sem framdir eru á Gaza þar sem börn eru drepin í umvörpum. Þá minntist hún einnig á árásir á almenna borgara í Úkraínu og hungurdauða í Súdan.
Rithöfundurinn Stefán Máni Sigþórsson lét predikun biskupsins fara í taugarnar á sér og skrifaði stutta en hnitmiðaða færslu á X, sem hljóðaði eftirfarandi:
„Hvatti landsmenn til þess að styðja hryðjuverk, mannrán, morð á konum og börnum, viðurstyggð, íslam, öfga og barbarisma.“
Guðlaugur nokkur svarar rithöfundinum og lætur hann heyra það.
„Ég minni á að Ísrael hefur ALLTAF myrt langt um fleiri saklausa borgara og börn en Hamas - hvert einasta ár frá stofun Hamas. Þetta er vel skráð og algjörlega augljóst öllum þeim sem eru ekki beinlínis rasistar og múslimahatarar (eins og einn leiðinlegasti rithöfundur Íslands er).“
Stefán Máni svaraði að bragði: „Ekki tala svona um Hallgrím Helgason“.
Guðlaugur svaraði aftur: „Mér dettur það ekki í hug. Hann er þó amk þokkalega frumlegur og vel skrifandi.“
Stefán Máni vakti athygli í byrjun mánaðar þegar hann tróð sér inn í umræðuna um hina geisivinsælu þætti Adolescence, sem fjalla um ofbeldi meðal unglingsdrengja í Bretlandi en rithöfundurinn sagðist ekki hafa horft á þættina því þeir væru „anti-white“.
Byggði hann þá skoðun sína líklega á þeim misskilningi margra á hægri vængnum, að þættirnir væru byggðir á morðmáli þar sem dökkur drengur myrti þrjár ungar stúlkur í Southport síðasta sumar og að kynþætti gerandans hafi verið breytt við gerð þáttanna. Hið rétta er hins vegar að þættirnir byggja á fjölmörgum ofbeldismálum sem komið hafa upp í Bretlandi á undanförnum árum. Þá var byrjað að taka upp þáttaröðina áður en stunguárásin í Southport átti sér stað.
Stefán Máni hefur nú eytt X-færslu sinni um biskup Íslands en yfir átta þúsund manns hafði séð hana áður en hún hvarf.
Athugasemdir