Sérstakur saksóknari, Ólafur Þ. Hauksson, gerði verktakasamning við fyrirtækið PPP sf. um rannsókn tiltekins sakamáls. Í samningnum, sem Morgunblaðið hefur undir höndum, kemur fram að fyrirtækið eigi að ljúka rannsókn sem eigendur þess, Guðmundur Haukur Gunnarsson og Jón Óttar Ólafsson, höfðu áður sinnt sem starfsmenn embættisins.
Þeir stofnuðu PPP sf. á meðan þeir störfuðu enn hjá sérstökum saksóknara, og í desember 2011 unnu þeir bæði fyrir embættið og nýstofnað fyrirtækið, að því er virðist að sömu verkefnum.
Grunur vaknaði síðar um að þeir hefðu tekið gögn ólöglega frá embættinu og brotið þagnarskyldu, og voru þeir kærðir til ríkissaksóknara. Í lögregluskýrslu með Ólafi Þ. Haukssyni, sem Morgunblaðið hefur einnig undir höndum, kemur fram að hann hafi vitað af stofnun fyrirtækisins og að það hefði svipuð markmið og verkefni tengd slitabúum og öðrum stórum hagsmunaaðilum.
Fleiri tengjast málinu
Ríkissaksóknari ákvað í gær að fela lögreglunni á Suðurlandi að rannsaka málið. Hluti rannsóknarinnar snýr að ákvörðun Sigríðar J. Friðjónsdóttur ríkissaksóknara um að láta rannsókn á gagnaleka niður falla árið 2012.
Þorbjörg Sigríður Gunnlaugsdóttir dómsmálaráðherra vonast til að eftirlitsnefnd með störfum lögreglu taki frumkvæði í málinu, en nefndin getur þó ekki rannsakað embættisfærslur saksóknara sjálfs.
Málefnið verður líklega tekið fyrir á fundi stjórnskipunar- og eftirlitsnefndar Alþingis á mánudag. Heimildir Morgunblaðsins herma að Grímur Grímsson, þingmaður Viðreisnar og nefndarmaður, muni ekki mæta á fundinn, en hann starfaði áður með Guðmundi Hauki og Jóni Óttari hjá embætti sérstaks saksóknara.
Athugasemdir