Ekki sála gistir fangageymslur lögreglunnar á höfuðborgarsvæðinu eftir nóttina en 87 mál voru skráð í kerfi hennar. Samkvæmt dagbók lögreglunnar var „mjög rólegt yfir þessu“. Hér má sjá nokkur dæmi.
Lögreglan á Hverfisgötu vísaði óvelkomnum aðilum út af hótelum og fyrirtækjum víðsvegar um miðborgina og annaðist útkall vegna þjófnaðar í matvöruverslun.
Efnaleki varð á iðnaðarsvæði í Hafnarfirði en samkvæmt slökkviliðinu á höfuðborgarsvæðinu lak sýra þegar gat kom á 1000 lítra bamba. Var aðgangur að svæðinu takmarkaður á meðan slökkviliðið athafnaði sig.
Lögreglan sem annast verkefni í Kópavogi og Breiðholti handtók ökumann vegna gruns um vímuefnaakstur. Var hann sviptur ökurétti og var lagt hald á fíkniefnum. Var hann fluttur á lögreglustöð í hefðbundið ferli og sleppt að því loknu.
Slökkviliðið á höfuðborgasvæðinu hafði ólíkt lögreglunni í nógu að snúast en síðastliðinn sólarhring voru 90 boðanir fyrir sjúkrabíla og af þeim voru 11 forgangsverkefni. Þá var dælubíll sendur út sex sinnum. Fyrir utan sýrulekann sem segir frá hér að ofan, annaðist slökkviliðið fjölbreytt verkefni, þar á meðal olíuleka af bíl, reykjarlykt sem reyndist svo af eðlilegri ástæðu, vatnsleki, gróðureldur og eldur í bálkesti í Elliðarárdal. Minnir slökkviliðið fólk á það í Facebook-færslu í morgun, að fara sérstaklega varlega með eld og helst ekki kveikja eld þar sem gróður er þurr.
Athugasemdir