Ársskýrsla GRÓ er komin út og þar kemur fram að alls hafi útskrifast 97 sérfræðingar úr þjálfunarnámi á vegum GRÓ – Þekkingarmiðstöðvar þróunarsamvinnu á árinu 2024.
Þar kemur fram að í lok árs höfðu 1.767 sérfræðingar lokið fimm til sex mánaða námi í skólunum fjórum sem starfræktir eru á vegum GRÓ, það er Jafnréttisskólanum, Jarðhitaskólanum, Landgræðsluskólanum og Sjávarútvegsskólanum.
Þá styrkir GRÓ einnig útskrifaða nemendur til framhaldsnáms; luku sjö styrkþegar slíku námi á árinu - tveir doktorsprófi og fimm meistaragráðu.
Nemendur Jafnréttisskóla GRÓ í námsferð um Suðurland í fyrra
Vert er að minnast á að einnig hafi verið ýmis stutt námskeið haldin í samstarfslöndunum, sem rúmlega 400 manns sóttu, og nýju netnámskeiði var hleypt af stokkunum.
Í nýútkominni ársskýrslu GRÓ er greint frá starfi skólanna fjögurra, sem og því sem var efst á baugi í starfi GRÓ á árinu. GRÓ starfar undir merkjum Mennta-, vísinda- og menningarmálastofnunar Sameinuðu þjóðanna (UNESCO).
Segir Þorgerður Katrín Gunnarsdóttir utanríkisráðherra að „skólarnir sem starfræktir eru á vegum GRÓ hafa frá stofnun verið órjúfanlegur hluti af alþjóðlegri þróunarsamvinnu Íslands“ og segir hún einnig að „rætur þeirra ná aftur til áttunda áratugar síðustu aldar, þegar Ísland var að stíga sín fyrstu skref sem veitandi og samstarfsríki í þróunarsamvinnu eftir að hafa sjálft þegið þróunaraðstoð örfáum árum áður.“
Þorgerður Katrín Gunnarsdóttir
Bent er á að eitt sinn hafi Ísland verið á meðal fátækustu ríkja Evrópu, og „byggir sú velsæld sem tekist hefur að skapa hér á landi að miklu leyti á framþróun á þeim sviðum sem skólarnir starfa á“ segir utanríkisráðherra að og nefnir einnig að „reynsla okkar og sérþekking getur þannig skipt miklu máli til að efla sjálfbæra þróun í öðrum löndum og stuðlað að framgangi heimsmarkmiða Sameinuðu þjóðanna.“
Í skýrslunni nýútkomnu er einnig að finna viðauka um starf hvers og eins skóla sem og sögur af starfi nemenda eftir útskrift. Og einnig „dæmi um hvernig þeir hafa nýtt þjálfunina til góðs í heimalöndum sínum.“
Allar upplýsingar um starf ársins eru færðar inn í árangursramma þar sem umfang starfseminnar er sett fram á samræmdan hátt og á „meðal helstu verkefna sem GRÓ vann að í fyrra var að móta stefnu um hvernig megi auka stuðning við nemendur eftir útskrift og hvetja útskrifaða nemendur til stofnunar samtaka í heimalöndum sínum“ því þannig geti „nemendur unnið saman að því að miðla þekkingu sinni og aflað sér nýrrar þekkingar, auk þess að efla tengsl þeirra við íslensk sendiráð í samstarfslöndunum og svæðisskrifstofur UNESCO“ segir Þorgerður Katrín.
Einnig kemur fram að viðamikil óháð úttekt fyrirtækisins GOPA, sem utanríkisráðuneytið lét gera árið 2024, staðfesti góðan árangur af starfinu:
„Helsta niðurstaða úttektarinnar, sem tók til tímabilsins 2018-2023, var að skólarnir hafi með skilvirkum hætti stutt við ungt fagfólk og samstarfsstofnanir í 76 ríkjum á tímabilinu og þannig náð tilætluðum árangri í að gera útskrifuðum nemendum kleift að vinna að heimsmarkmiðum Sameinuðu þjóðanna“ og þá hafi þjálfun er nemendur hlutu skapað „grundvöll fyrir þá til að tileinka sér nýja þekkingu, hæfni og aðferðir“ sagði Þorgerður Katrín að lokum.
Athugasemdir