Lögreglan á höfuðborgarsvæðinu hefur beðist einlæglega afsökunar á að hafa dreift mynd sem reyndist fölsuð og unnin með aðstoð gervigreindar. Myndin var send út í tengslum við rannsókn á eldsneytisþjófnaði í borginni, en gaf ekki rétta mynd af einstaklingunum sem óskað var upplýsinga um.
Myndin hefur nú verið fjarlægð af öllum miðlum lögreglu og í stað hennar verður rétt mynd send fjölmiðlum. Lögreglan hefur jafnframt beðið um að fjölmiðlar fjarlægi hina fölsuðu mynd eða taki skýrt fram að hún sé röng.
Í tilkynningu segir að nauðsynlegt hefði verið að sannreyna myndefnið áður en því var dreift. Við nánari skoðun hafi verið ljóst að öryggismyndavél í þessari fjarlægð gæti ekki skilað jafn skýru myndefni, sem lögreglan þekki vel úr daglegum störfum.
Verklag embættisins verður nú tekið til endurskoðunar til að tryggja að sambærilegt atvik endurtaki sig ekki. Lögreglan bendir á að tilkoma gervigreindar auki hættu á fölsunum, falsfréttum og röngum sakargiftum og að allir, þar með talin lögreglan sjálf, þurfi að vera á varðbergi gagnvart slíku.
Athugasemdir